قازاقستان ۇلتتىق بانكى 2025 جىلعى 28 ناۋرىزدان باستاپ جاڭا ديزاينداعى نومينالى 1 000 تەڭگەلىك بانكنوتالاردى اينالىمعا شىعارادى. بۇل - "ساق ءستيلى" سەرياسىمەن شىققان ءتورتىنشى جاڭا بانكنوتا، دەپ حابارلايدى Dalanews.kz.
ول قازاقى ويۋ-ورنەكتىڭ ءتۇپ نەگىزى سانالاتىن جانە كوشپەندىلەردىڭ بىرەگەي مادەنيەتىنەن باستاپ بۇگىنگى قازاقستانعا دەيىنگى ەل مۇراسىن بەينەلەيتىن "ساق ءستيلى" ەلەمەنتتەرىنە نەگىزدەلگەن.
"دەگەنمەن، بانكنوتالار جاپپاي قولدانىسقا 2025 جىلدىڭ ەكىنشى جارتىسىندا بەرىلە باستايدى. سەبەبى ولاردى ەلىمىزدىڭ بارلىق ايماعىنا جەتكىزۋ ءۇشىن جانە جابدىقتاردى (بانكوماتتار، تەرمينالدار جانە باسقا دا كاسسالىق تەحنيكالار) بەيىمدەۋ ءۇشىن قوسىمشا ۋاقىت قاجەت"، دەلىنگەن ۇلتتىق بانك حابارلاماسىندا.
اقشا بەلگىسىنىڭ ديزاينى مەن فورماسى تۋرالى
بانكنوتالاردىڭ ءتۇسى – قوڭىر جانە اشىق قوڭىر.
بانكنوتانىڭ بەت جاعىندا:
- كوكتە قالىقتاپ ۇشقان قۇسپەن "ءومىر اعاشىنىڭ" بۇتاعى (ەسىك قورعانى، ب. ز. د. 5-4 عع.، التىن ادام باس كيىمىنىڭ ءبىر بولىگى، تابيعات پەن نانىم بايلانىسىنىڭ قاسيەتتى ماعىناسى)؛
- دنق ءسپيرالىن جانە ادامنىڭ تابيعاتپەن بايلانىسىن بىلدىرەتىن ويۋ-ورنەكپەن ستيلدەندىرىلگەن شەكسىزدىك سيمۆولى؛
- ارتەفاكت – ءتوس ايىل (تارتپا) ەلەمەنتى بۇرالعان جىرتقىش فورماسىمەن بەرىكتىك پەن توزىمدىلىكتىڭ سيمۆولى رەتىندە (بەسوبا قورعانى، ب. ز. د. 6-4 عع.، ورال ءوڭىرى، باتىس قازاقستان).
بانكنوتانىڭ ارتقى جاعىندا:
- ويۋ-ورنەكپەن ستيلدەنگەن قالقان فونىندا توبەت پەن تازى تۇقىمداس يتتەر؛
- دوڭگەلەك قازاق حالقىنىڭ ويۋ-ورنەگى، "قالقان" بەينەسى – قۇندىلىقتاردى قورعاۋ نىشانى، ەجەلگى سيمۆول – ءتورت تاراپ، ورتاسىنداعى كۇن بەلگىسى – جاسامپازدىق ەنەرگياسى مەن ءومىر نىشانى.
سونداي-اق، بانكنوتانىڭ سىرت جاعىندا ارتەفاكت، ءتوس ايىل (تارتپا) ەلەمەنتى بۇرالعان جىرتقىش فورماسىمەن بەرىكتىك پەن توزىمدىلىكتىڭ سيمۆولىن (قىرىق-وبا قورعانى، ب. ز. د. 7-6 عع.، باتىس قازاقستان) كورسەتەدى. بانكنوتانىڭ ورتاسىندا فون رەتىندە ويۋ-ورنەك ستيلىندە بەينەلەنگەن شەكسىزدىك سيمۆولىنا ءتان قازاقستاننىڭ دالا جوتالارى بەرىلگەن.
"نومينالى 1 000 تەڭگەلىك جاڭا بانكنوتالار 2025 جىلعى 28 ناۋرىزدان باستاپ اينالىمعا ەنەدى جانە اينالىمدا جۇرگەن 2014 جىلعى ۇلگىدەگى نومينالى 1 000 تەڭگەلىك ۇلتتىق ۆاليۋتا بانكنوتالارىمەن (بۇدان ءارى – ەسكى ۇلگىدەگى بانكنوتا) ەكى جىل بويى اۋىستىرىلادى. ياعني، ەسكى ۇلگىدەگى بارلىق بانكنوتا ەكى جىل ىشىندە اينالىمنان بىرتىندەپ الىنادى. تيىسىنشە، بانكنوتالار اينالىمدا قاتار جۇرگەن ۋاقىتتا حالىققا ەسكى ۇلگىدەگى بانكنوتالاردى ەكىنشى دەڭگەيلى بانكتەردەگى نەمەسە قۇب فيليالدارىنداعى جاڭا بانكنوتالارعا ايىرباستاۋدىڭ قاجەتى جوق. جاڭا جانە ەسكى ۇلگىدەگى بانكنوتالاردىڭ اينالىمدا قاتار ءجۇرۋ كەزەڭى 2025 جىلدىڭ 28 ناۋرىزىنان 2027 جىلدىڭ 27 ناۋرىزىنا دەيىنگى ارالىقتى قامتيدى"، دەلىنگەن ۇلتتىق بانك حابارلاماسىندا.
ول كەزەڭ اياقتالعان سوڭ، ياعني 2027 جىلعى 28 ناۋرىزدان باستاپ بارلىق بانك پەن قازپوشتادا ەسكى ۇلگىدەگى بانكنوتالاردى 3 جىل ىشىندە، ياعني 2030 جىلعى 27 ناۋرىزعا دەيىن جاڭا ۇلگىدەگى بانكنوتالارعا ايىرباستاۋعا مۇمكىندىك بار. ال قۇب فيليالدارىندا ولاردى مەرزىمسىز ايىرباستاۋعا بولادى.
