قازاقستان قور بيرجاسىندا (KASE) 2025 جىلعى 21 ساۋىردە ساعات 15:30-دا شەتەل ۆاليۋتالارى بويىنشا كۇندىزگى ساۋدا-ساتتىق توقتاتىلدى. ونىڭ قورىتىندىسى بويىنشا 1 اقش دوللارىنىڭ ورتاشا باعامى 521،53 تەڭگەنى قۇراپ، ءبىر تاۋلىكتە 0،6 تەڭگەگە شامالى ارزاندادى، دەپ حابارلايدى Dalanews.kz.
ق ر ۇلتتىق بانكتىڭ 21 ساۋىرگە بەكىتكەن 1 اقش دوللارىنىڭ رەسمي باعامى 521،9 تەڭگە، 1 ەۆرو 593،5 تەڭگە بولعان ەدى.
Kurs.kz مالىمەتتەرى بويىنشا، ەلىمىزدەگى اقشا ايىرباستاۋ ورىندارىندا بۇگىندەرى 1 اقش دوللارى 520،1 تەڭگەدەن ساتىپ الىنىپ، 522،7 تەگەگە ساتىلۋدا، سول سەكىلدى 1 ەۆرو 597 تەڭگەدەن ساتىپ الىنىپ، 603 تەڭگەگە ساتىلۋدا.
مۇنايدىڭ الەمدىك نارىقتاعى باعاسى بۇگىن تاعى ازداپ تومەندەدى.
- ICE Futures ەلەكتروندىق ساۋدا بيرجاسىندا Brent ماركالى مۇنايدىڭ ماۋسىم فيۋچەرستەرىنىڭ قۇنى 1،65%-عا ارزانداپ، 1 باررەلى 66،84 دوللاردى قۇرادى.
- NYMEX ەلەكتروندى ساۋدا بيرجاسىندا WTI ماركالى مۇنايدىڭ مامىر فيۋچەرستەرىنىڭ قۇنى 1،78%-عا ارزانداپ، 1 باررەلى 62،87 دوللار بولدى.
ماماندار ەۆرونىڭ كۇش الۋىنا الەمدىك دەڭگەيدە دوللاردىڭ قۇنسىزدانۋى تۇرتكى ەكەنىن ايتادى. سول سەبەپتى، اسىرەسە، دەمالىس ماۋسىمى قارساڭىندا ساياحاتتاۋشىلاردىڭ تاڭداۋى دوللاردان گورى ەۆروعا تۇسۋدە كورىنەدى.
بۇگىن سايتىمىزدا ەلىمىزدەگى ەكىنشى دەڭگەيدەگى بانكتەردىڭ التىن قۇيمالارىنىڭ باعاسىن جاريالاعان بولاتىنبىز. التىننىڭ ءبىر ۋنسياسىنىڭ قۇنى 3 400 دوللار بولىپ، تاريحي جوعارى شەكتى يگەردى. وسىلايشا 2020 جىلدىڭ باسىنان باستاپ قىمبات مەتالدىڭ قۇنى ەكى ەسەگە ءوستى، ياعني ءوسىم كورسەتكىشى - 100%-دان استام. ق ر ۇلتتىق بانكتىڭ 21 ساۋىردە بەكىتكەن 1 گرامم التىن قۇنى - 55 780،85 تەڭگە. ايتا كەتسەك، Goldman Sachs التىن ۋنسياسىنىڭ قۇنى 4500 دوللارعا دەيىن قىمباتتايتىنىن باجايلاپ، بولجام جاريالاعان بولاتىن. كەيبىر ساراپشى ماماندار جىل سوڭىنا دەيىن بۇل باعانىڭ 3600 دوللاردى قۇرايتىنىن بولجايدى. 1 ۋنسيادا شامامەن 28 گرامم التىن بار. دەمەك، Goldman Sachs بولجامىنا سۇيەنسەك، 1 گرامم التىن (999.9 قۇيماسىنداعى) 83 200 تەڭگەگە بارۋى ىقتيمال. ال جىل سوڭىنا دەگەن بولجامدى باعا سوندا شامامەن 67 مىڭ تەڭگە بولىپ قالادى.
