Ғылым және жоғары білім министрі Саясат Нұрбек грантсыз қалған түлектердің сотқа шағымдануына қатысты пікір білдірді, деп хабарлайды Dalanews.kz.
“Сот отырысы келесі аптаға шегерілді, офлайн форматта өтеді. Сот шешімі сол аптада талқыланады. Негізі, бір ғана адам шағымданған, ал қалған түлектердің мәселелері шешімін тауып жатыр. Кейбір шағымдар сот қарауынан қайтарылды,” – деп жауап берді Саясат Нұрбек сенат дәлізінде журналистер қойған сұраққа.
Министр түлектердің түсірген арызының орынсыз екенін алға тартты.
“Бұл шағыммен келіспеймін. 20 адам сотқа жүгінді, олардың әр жағдайы жеке қарастырылды. Нәтижесінде, 15 адам грантқа ие болды. Бірақ соттың өзі кей арыздардың мәнісін түсінбеді,” – деп түсіндірді ол.
Еске салайық, су басқан өңірлер үшін бөлінген квотаның кесірінен жоғары балл жинаса да мемлекеттік грантқа ілікпей қалған талапкер бірінші болып Ғылым және жоғары білім министрлігін сотқа берген еді.
Осы тұста белгілі құқық қорғаушы Халида Әжіғұлова Dalanews.kz агенттігіне мәселенің жай-жапсарын мәлімдеген болатын.
Адвокат “министрлік қатесін мойындамай, заңнаманы бұза отырып, ТЖ квотасын өз бетінше енгізуге құқылы болғандай кейіп танытуда” деп үндеу жасады.
“Министрлік өз гранттарынан заңсыз айырылған талапкерлерді үнемі елемей қала алмайды. Су тасқынынан зардап шеккендер түлектерге көмектесу мақсатында жылдар бойы грантқа қол жеткізу үшін тынбай дайындалған басқа балалардың құқықтарын шектей алмаймыз. Басқа біреудің есебінен қайырымдылық жасауға болмайды.
Өкінішке қарай, биыл кейбір түлектер университетке бара алмайды, себебі оқу орындары ҰБТ-дан жоғары балл алғанына қарамастан оларға ішкі гранттарды беруден бас тартқан. Ал олардың отбасылары оқу ақысын төлеу шамалары жетпейтінін айтып отыр”, — деді адвокат.
Ол бұл іске бей-жай қарамайтындардан қолдау сұрады. Адвокат гранттан қағылғандар сотта құқығын қорғағанға дейін олардың оқу ақысын төлеуге көмектесетін жандар табылса деген тілегін білдірді.
Халида Әжіғұловаға 200-ден астам бала жүгінген, олар енді өз құқықтарын ұлттық және халықаралық органдарда қорғау үшін кәсіби білім алуға мәжбүр.
“Ғылым министрлігінің әділетсіздігіне көнгісі келмейтін түлектерге тәнтімін. Барлық БАҚ пен ар-намысты азаматтарды балаларды қолдауды жалғастыруға шақырамын. Іс сот қарауына түскен бойда міндетті түрде хабарлаймыз. Әлі ондаған талап-арыздар қаралуға дайындалуда. Балалар өз құқықтары үшін күресуге белсенді түрде кірісіп, әділеттілікке жеткенше тоқтамайды. Ал біз, ар-намысты ересектер, оларды қолдауымыз қажет. Мен міндетті түрде қолдаймын.
Төменгі палата депутаттарына алғысымды білдіремін, олар да министрліктің заң шығарушы функцияларын өзіне меншіктеп алуына наразылық білдірді. Бас прокуратура қызметкерлеріне де алғысымды білдіремін, олар да Ғылым министрлігінің ТЖ квотасын енгізу әрекеттерінде заң бұзушылықтарын көріп, мұны тексеруге уәде берді. Әділеттілік орнауы тиіс!” — деді адвокат.
