Қазақстанда мемлекеттік кәсіпорын басшыларын іріктеуге арналған жаңа сервис іске қосылады, деп хабарлайды Dalanews.kz.

e-Qazyna.kz цифрлық платформасында Talapker сервисі пайда болды, ол мемлекеттік кәсіпорын басшыларын іріктеу процесін автоматтандырады. Енді барлық іріктеу тек электрондық форматта өтеді.

“Жаңа жүйе өтінім беру процесін жеңілдетіп, адам факторының әсерін азайтады, осылайша сыбайлас жемқорлық тәуекелдерін төмендетеді. Кандидаттар енді құжаттарды қағаз жүзінде емес, онлайн тапсыра алады, ал комиссия өтінімдерді электронды түрде қарап, іріктеу жүргізеді. Барлық процесс – түйіндемені жіберуден бастап, түпкілікті шешімге дейін – платформада өтеді, бұл уақыт пен әкімшілік шығындарды азайтады”, – делінген хабарламада.

Talapker сервисі конкурсқа елдің кез келген өңірінен қатысуға мүмкіндік беріп, субъективтілікті болдырмайды және ашықтықты арттырады. Мемлекеттік деректер базасымен және кадрлық жүйелермен интеграциялануының арқасында кандидаттар туралы мәліметтер жылдам тексеріліп, кадрлық резервті басқаруға арналған аналитика қалыптастырылады.

Қазіргі уақытта Қазақстанда 5344 кәсіпорын коммуналдық меншікке, ал 171 кәсіпорын республикалық меншікке тиесілі. Олардың басым бөлігінің басшылары енді Talapker сервисі арқылы іріктелетін болады.