Талғарда жанжал кезінде қаза тапқан жасөспірім Шерзат Болаттың отбасының адвокаты жақында 15 тәулікке қамауға алынған Қаржаубай Нұрымовтың жағдайына қатысты мәлімдеме жасады, деп хабарлайды Dalanews.kz.
“Біз бүгін Қаржаубайдың хал-жағдайын білу үшін Қонаев қаласына келдік. Уақытша ұстау изоляторына кіріп, жағдайын біліп, амандасып шықтық. Бәрі дұрыс. Енді мұндай жерде отырған адамның хал-жағдайын сұрау ыңғайсыз дүние. Бірақ дені сау, ешкім қысым көрсетпеген. Жылы жерде отыр және тамағы уақытылы беріліп жатыр. Бұйырса, 25-і түнде шығады”, — деді адвокат Асылбек Абдраимов.
Айта кетейік, бұған дейін Шерзат Болаттың бірнеше туысы қамауға алынған болатын.
Еңбекшіқазақ аудандық соты әкімшілік іс жүргізу тәртібімен істерді қарау нәтижелері бойынша азамат Салтанат Нұрымова ұсақ бұзақылық жасағаны үшін (ӘҚБтК 434-бабының 1-бөлігі) 20 АЕК мөлшерінде айыппұл салумен әкімшілік жауапкершілікке тартылды.
ҚР бейбіт жиналыстарды ұйымдастыру және өткізу тәртібі туралы заңнамасын бұзғаны үшін (ӘҚБтК 488- бабының 8-бөлімі.) азаматтығы жоқ Бақыт Реймова әкімшілік тәртіппен 15 тәулікке қамауға алынып, кейіннен ҚР шегінен депортациялау туралы шешім шықты.
“Қоғамдық орында балағат сөздер айтқаны, құқық қорғау органдарының қызметкерлерін қорлап, сондай-ақ қоғамдық тәртіп пен азаматтардың тыныштығын бұзатын айналасындағыларға құрметсіздік танытатын іс-әрекеттер жасағаны және көлік құралдарының қозғалысы үшін кедергілер жасағаны үшін Қаржаубай Нұрымов 15 тәулікке әкімшілік қамауға алынды”, — делінген хабарламада.
Содан соң құқық қорғаушы Айтбек Амангелді марқұм Шерзаттың отбасын қорғап, әділдікке қол жеткізу үшін қатарлары тағы екі заңгермен толыққанын жеткізді.
“Құрметті достар, жақсы жаңалығымызды айта кетейік! Қылмыстық істердің санын ескере отырып, бүгіннен бастап Болаттар отбасын қорғау тобына Алматы қалалық адвокаттар алқасының екі тәжірибелі заңгері – Абдраимов Асылбек Ғабиденұлы мен Адаев Ерлан Амантайұлы қосылады”, — деп мәлімдеді ол.
Оның айтуынша, алдағы уақытта заңгерлер бірлесіп жұмыс атқарады.
“Саида, Карина және Марал өз бағыттары бойынша жұмысын жалғастыра береді. Алайда істің ауқымы үлкен болғандықтан, Асылбек пен Ерлан команданы күшейтіп, қыздармен бірге әділдікке қол жеткізу үшін жұмыс істейтін болады”, — деп қосты ол.
Еске салайық, бұған дейін Талғарда жаппай төбелес болып, салдарынан 16 жастағы жасөспірім Шерзат Болат көз жұмды.
Кәмелетке толмаған баланы өлтіру фактісі бойынша Алматы облысының полиция департаменті қылмыстық іс қозғады.
Қазіргі таңда кінәлі деп танылған 11 адам ұсталып, уақытша ұстау изоляторына қамауға алынды.
Көп ұзамай, яғни 9 желтоқсанда марқұм Шерзат Болаттың ағасы Нұрқанат Ғайыпбаев ажал құшты. Полиция департаментінің алдын ала деректері бойынша оның суицид жасағанын мәлімдеді. Оған дәлел ретінде полицейлер Нұрқанаттың туысына мессенджер арқылы жазған хатын жария етті.
Хабарламада ол туысқандарымен қоштасып, жиенінің жанына жерлеуді сұраған. Бұл факті бойынша қылмыстық іс қозғалды.
Ал 10 желтоқсанда оның өліміне қатысты сараптама қорытындысы шықты.
"Сот-медициналық сараптаманың алдын ала болжамы бойынша, 9 желтоқсанда Талғардың шетінде табылған 30 жастағы ер адамның мәйіті өзін-өзі асу арқылы механикалық асфиксия нәтижесінде болғанын көрсетті. Денесінде зорлық-зомбылық сипаттағы белгілер жоқ.
Сарапшылармен анықталған дене жарақаттары, мысалы, странгуляциялық және мойынның абразиялары асылған жіпті қолданған кезінде пайда болатын жарақаттарға сәйкес келетінін көрсетті. Барлық белгілер суицидті көрсетеді, мойынындағы зақымдану сипаты мұндай жағдайларға тән", - делінген хабарламада.
Ал марқұм Шерзаттың әкесі бауыры Нұрқанат Ғайыпбаевты жер қойнына тапсырғанан кейін, бұқаралық ақпарат құралдарымен кездесуді талап етіп, көшеге шықты. Алайда араға ұзақ уақыт салмай Қаржаубай Нұрымовты полиция қызметкерлері ұстап әкетті.
"Қаржаубай Нұрымов прокурордың заңды сақтау туралы түсіндірмелерін елемеді. Шектен тыс агрессивті мінез-құлық танытып, басқаларды өз-өзіне қол жұмсаймын деп қорқытты. Сонымен қатар полиция қызметкеріне пышақпен шабуыл жасады. Оның мінез-құлқы өзіне де, басқаларға да қауіп төндірді", — делінген хабарламада.
Осылайша Шерзат Болаттың әкесі мен әпкесі қамауға алынды.
