Мамыр айында елімізде жылдық инфляция жеделдеп, 11,3% болды (сәуірде – 10,7%). Жылдық инфляция 16 өңірде жеделдеді, 3 өңірде баяулап, 1 өңірде бұрынғы деңгейде сақталды. Мұндай мәліметпен Ұлттық Банк бөлісті, деп хабарлайды Dalanews.kz.

Реттеуші органның мәліметінше, жылдық инфляцияның 13,0%-дық ең жоғары мәні Алматы қаласында тіркелді.

"Мамырда азық-түлік тауарларының бағасы жылдық мәнде 9,6%-ға дейін жеделдеді (сәуірде – 8,5%). Осы топқа жататын тауарлар бағасы Ақмола облысында (11,4%) ең жоғары, ал Алматы қаласында (8,0%) төмен өсім көрсетті", делінген хабарламада.

Мамырда азық-түлікке жатпайтын тауарлар бағасының өсімі жылдық мәнде 9,0%-ға жетті (сәуірде – 8,9%). Ең жоғары мән Түркістан облысында (14,2%), ең төменгі мән Павлодар облысында (5,4%) тіркелді.

Мамырда ақылы қызметтердің бағасы жылдық мәнде 16,0%-ға дейін өсті (сәуірде – 15,7%). Сонымен қатар Алматы қаласында (22,5%) баға жалпы республикалық деңгейден жоғары, Алматы облысында (11,3%) айтарлықтай төмен өсім тіркелді.

Мамырда айлық инфляция елде 0,9%-ға өсті.

Айта кетсек, 2025 жылғы мамырда халықтың алдағы бір жылдағы инфляциялық күтулері сезілетін инфляцияға берілген бағаның өсімі аясында 14,1%-ға дейін артты. Сонымен қатар, бес жылдық кезеңде күтілетін инфляцияның медианалық мәні сәл төмендегенімен, әлі де жоғары деңгейде қалып отыр. Бұл туралы Ұлттық Банктің ай сайын жүргізетін сауалнама қорытындысында айтылады.