Президент Қасым-Жомарт Тоқаев Үкіметтің кеңейтілген отырысында сөз сөйледі, деп хабарлайды Dalanews.kz.

️Мемлекет басшысы инфляцияны ойға қонымды, қалыпты деңгейге түсіру қажет екенін айтты.

"Оның шарықтап кетуіне жол бермеу керек. Инфляция не себепті жоғары болып тұрғаны белгілі, кеселдің себебі анықталды. Енді осы мәселені шешу керек. Бірақ ұсынылатын шаралар елдің дамуына кері әсерін тигізбеуі қажет. Дәл осы тұста түрлі пікір айтылып жатыр", - деді Тоқаев.

Президент Үкімет пен Ұлттық банкке бірлесіп, нақты іс-қимыл алгоритмін әзірлеуді тапсырды.

"Осы маңызды жұмысқа барлық мекеме өкілдері мен сарапшылар қатысуға тиіс. Тағы да қайталап айтамын: қолайсыз ахуалды шұғыл ретке келтіру қажет. Биылдан бастап үш жыл қатарынан инфляцияны төмендету үшін нақты шаралар қабылдау керек. Бірлескен іс-қимыл бағдарламасын сапалы орындау айрықша маңызды. Мәселені шешудің орнына бос сөзді көбейтіп, қажетсіз "жол карталарын" әзірлеу – жауапкершіліктен қашу деген сөз. Алдын ала ескерту: ондай жағдайда қатаң шара қолданылады. Халықтың табысы артса ғана, нақты нәтижеге қол жеткіздік деп санауға болады", - деді Мемлекет басшысы.