Қазақстанда жақында әртүрлі банктер арасында телефон нөмірі арқылы ақша аударымдары іске қосылады. Бұл туралы Ұлттық банк төрағасының орынбасары Берік Шолпанқұлов мәлімдеді. Қазір Ұлттық төлем корпорациясы банктерді жаңа жүйеге кезең-кезеңімен қосып жатыр, деп хабарлайды Dalanews.kz.

«Тоғыз банкпен келісімшартқа қол қойылды. Олар – "Халық банкі", "Банк ЦентрКредит", Freedom Bank, Altyn Bank, RBK, Bereke, Forte, Home Credit Bank және "Нұрбанк". Келісімшартқа қол қою – банктердің техникалық қосылу мен жүйе жасауды бастағанын білдіреді», – деді Шолпанқұлов.

Оның айтуынша, алғашқы бес банк клиенттері үшін телефон нөмірі арқылы аударым жасау қызметі маусым айында іске қосылады. Бұл банктер: Халық банкі, Freedom Bank, Altyn Bank, RBK және Home Credit Bank. Қалған банктер жүйеге кезең-кезеңімен қосылады.

Шолпанқұлов жаңалықтың мәні тек телефон нөмірі арқылы ақша аударудың ыңғайлылығында емес, QR-код арқылы аралық банктік есеп айырысу енгізілетінін атап өтті.

«Былтыр біз осындай жүйе жасадық, қазір банктерді қосу жалғасуда. Бұл – технологиялық процесс, бәрі банктердің техникалық дайындығына байланысты. Кейбір банктердің ІТ-инфрақұрылымы күрделі, сондықтан уақыт созылып жатыр. Бірақ біз бұл жүйені жыл соңына дейін толық енгізуді көздеп отырмыз», – деді Шолпанқұлов.

Оның айтуынша, бірыңғай QR-кодты қолдану банктік қосымшалар сияқты ыңғайлы болады.

«Бұл – сіздің кәдімгі мобильді банктік қосымшаңыз. Мысалы, сіз А банкінің клиентісіз, дүкенге бардыңыз делік. Ол жерде басқа банк – В банкінің терминалы тұр. Сіз өз банкіңіздің қосымшасынан QR-кодты сканерлеп, төлем жасай аласыз», – деп түсіндірді ол.

Қазір QR арқылы төлем жасау тек бір банк ішіндегі экожүйеде ғана мүмкін. Жаңа жүйе тұтынушылар үшін әлдеқайда икемді болады.

«Сізге ыңғайлысы – қай банктің клиенті болсаңыз да, кез келген терминал арқылы төлем жасай аласыз», – деді ол.

Тарифтер туралы айта келе, Ұлттық банк төрағасының орынбасары комиссия мәселесі – нарықтық механизм екенін айтты.

«Тарифтер, тегін қызмет және тағы басқа мәселелер – бұл нарықтық құбылыс. Банктер мен төлем жүйелері көрсететін қызметтер қымбат серверлер мен инфрақұрылымды ұстауға бағытталған. Сондықтан біз бұл комиссия мөлшеріне тікелей араласпаймыз», – деп түсіндірді ол.

Соған қарамастан, Ұлттық банкте арнайы тарифтік кеңес құрылған. Онда банктермен төлем қолжетімділігі талқыланады. Шолпанқұловтың айтуынша, комиссияны азайту бойынша жүйелі жұмыс жүргізілуде.

«Банктерге қатысты комиссия мәселесінде жүйелі жұмыс жүріп жатыр. Кәсіпкерлер үшін комиссия негізінен екі бөліктен тұрады: интерчейндж мөлшерлемесі және банк комиссиясы. Интерчейндж – бұл Ұлттық банк пен халықаралық төлем жүйелері арасындағы қызметке қатысты мөлшерлеме. Бұл көрсеткіш қазір төмендеді», – деді ол.

Ұлттық банк өкілінің айтуынша, бәсекелестік нәтижесінде нарықтағы комиссиялар төмендеп келеді.

«Комиссиялар бәсекенің арқасында төмендейді. Бірыңғай QR-код жүйесі де осы тенденцияға сәйкес болады. Бірақ бұл QR-код арқылы төлем міндетті түрде тегін болады деген сөз емес. Бұл мәселе әлі талқыланып жатыр. Дегенмен, тұтынушылар үшін ол қазіргі сияқты тегін болып қала береді», – деп түйіндеді Берік Шолпанқұлов.