Мәжіліс депутаты Ринат Зайытов еліміздегі мәдени және білім беру мекемелеріндегі қауіпсіздік мәселесін көтеріп, егде жастағы күзетшілердің жұмыс істеуін сынға алды, деп хабарлайды Dalanews.kz.

Ол заң жобасының авторы Жарқынбек Амантайұлы мен ІІМ орынбасары Игорь Лепехаға ресми сауал жолдап, мектеп, аурухана, театр, музей сияқты мекемелердің террористер үшін осал нысан екенін алға тартты.

“Осындай мәдени орындарға барсаңыз, күзетшілердің кім екенін көресіз – 60-қа таяған апалар мен 70-ке жақындаған аталар. Олардың өзіне күзет керек. Құдай бетін аулақ қылсын, бірақ театрда немесе музейде төтенше жағдай орын алса, оған кім жауап береді? Бұл мәселе бойынша нақты талап қоюға бола ма? Мысалы, кемінде 30-дан асқан адамдарды ғана күзетке алу туралы ереже енгізуге мүмкіндік бар ма?” – деді Зайытов.

Бұл мәселеге қатысты депутат Жарқынбек Амантайұлы кері байланысын берді.

“Қоғамда, әсіресе балалар оқитын орындарда күзет сапасына қатысты сын-пікірлер жиі айтылады. Біздің жұмыс тобында да бұл мәселе көтерілді. Мектептер террористік қауіп-қатер ықтималдығы жоғары мекемелер қатарына жатады. Алайда күзетшілердің басты міндеті – шабуылды тойтару емес, тиісті органға дер кезінде хабар беру және қауіпсіздік шараларын жүзеге асыру.

Әрбір мекеме мемлекеттік сатып алу арқылы өз талаптарын қоя алады. Сондықтан күзетшілердің жасына қатысты шектеу енгізу – азаматтардың Конституциялық құқығына қайшы әрекет болуы мүмкін”, – деді ол.