Қазақстанның Туризм және спорт министрлігі ведомстводағы қаржылық заңбұзушылықтар туралы Жоғары аудиторлық палатаның (ЖАП) мәлімдемесіне қатысты пікір білдірді, деп хабарлайды Dalanews.kz.
Мәселе неден шықты
Бұған дейін ЖАП жалпы сомасы 17 миллиард теңгеге жуық қаржылық заңбұзушылықтар анықталғанын мәлімдеген. Оның басым бөлігі бюджет қаражатын тиімсіз пайдалануға қатысты. Атап айтқанда, әкімшілік қызметкерлерге берілген ірі көлемдегі сыйақылар сынға ұшырады.
"2021-2024 жылдары "Спортты дамыту дирекциясының" әкімшілік қызметкерлеріне 3,5 миллиард теңгеден астам сыйақы төленген. Кейбір жағдайларда сыйақы сомасы жалақы қорынан асып кеткен. Бір қызметкерге орташа есеппен жылына 7,7 миллион теңгеден берілген. Сонымен қатар, оқу-жаттығу процесінің сапасы үшін төленетін үстемеақылар тікелей спортшылармен жұмыс істемейтін қызметкерлерге де берілген", – делінген ЖАП мәлімдемесінде.
Министрлік жауабы
Министрлік таратқан баспасөз хабарламасында Жоғары аудиторлық палата жүргізген аудит жұмыс тәртібінде және өзара толық іс-қимыл жағдайында өткенін хабарлады.
"Аудиторлық палата көрсеткен проблемалардың басым бөлігі министрлікке қарасты бір мекеменің қызметіне қатысты. Мұндай деректер бойынша тергеу 2023 жылдан бері жалғасуда. Министрлік құқық қорғау органдарымен тығыз жұмыс істеп жатыр. Қорытындысында заң шеңберінде толық құқықтық баға беріледі", – делінген министрлік хабарламасында.
17 миллиард теңге қайдан шықты
Министрліктің мәліметінше, есепте көрсетілген 17 миллиард теңге көлеміндегі қаржылық мәселе бүкіл саланы жоспарлау, бақылау және шығындардың тиімділігін бағалау жүйесіндегі жүйелі мәселелерге қатысты.
