Qazaqstan halyq ártisi, Memleket jáne qoǵam qairatkeri Asanáli Áshimov, Qazaqstan Respýblikasy memlekettik Eltańba avtory Jandarbek Málibekov, «Ardagerler uiymy» respýblikalyq qoǵamdyq birlestiginiń tóraǵasy Ómirzaq Ozǵanbaev, Qazaqstan Ulttyq Ǵylym Akademiiasynyń Prezidenti, akademik, professor Murat Jurynov, QR Parlamenti Májilisiniń depýtaty Darhan Myńbai, jazýshy, Túrkistan oblysynyń «Qurmetti azamaty» Marhabat Baiǵut, qalamger, halyqaralyq «Alash» ádebi syilyǵynyń laýreaty, qoǵam qairatkeri Kópen Ámirbek, músinshi Tileýberdi Binash aldymen «Sapar ortalyǵynda» bolyp, mundaǵy jádigerlermen tanysty. Qazaqtyń tarihynan syr shertken beinebaian tamashalap, tarihi meken týraly tyń derektermen tanysty.
– Men ózim Kentaýda óstim. Ol kezdegi Túrkistan men qazirgi shahardyń aiyrmashylyǵy kóp. Kórkeiip, múldem ózgerip ketken. Búkil musylman qaýymy úshin ekinshi Mekke sanalatyn kieli Túrkistan qalasy endi týristik baǵytta damidy. Jańadan ashylǵan nysandar sonyń bastamasy. Sonymen qatar, bul qasietti mekende qanshama ulylarymyzdyń, handar men bilerimizdiń súiegi jatyr. Túrkistan eskertkishter qalasy bolýy kerek. Ábý-Nasyr ál Farabiden bastap barlyq tulǵalarymyz bir-birin tolyqtyryp, jalǵastyryp turýy tiis, – dedi Qazaqstan halyq ártisi, memleket jáne qoǵam qairatkeri Asanáli Áshimov.
– Elimizde 30 jyldyń ishinde jasalǵan túbegeili ózgerister, uly ister týraly sizder jaqsy habardarsyzdar. Osy jasalǵan jumystyń barlyǵy tikelei Elbasynyń atymen bailanysty. Osydan týra 3 jyl buryn Túrkistan oblysyn qurylyp, Túrkistan qalasyn kúlli túrki áleminiń ortalyǵyna ainaldyrýǵa múmkindik beretin uly jumystar bastaldy. Nursultan Ábishuly saliqaly saiasatynyń arqasynda búkil álemde Qazaqstannyń bedeli ósti. Minekei, osynyń barlyǵy Elbasynyń kóregendiginiń jemisi, eldiń abyroiynyń búkil álemge tańylǵanynyń kórsetkishi, – dedi óz sózinde «Ardagerler uiymy» respýblikalyq qoǵamdyq birlestiginiń tóraǵasy Ómirzaq Ozǵanbaev.
– Eń ulysy, men oilaimyn, ol – tarih. Sol tarihtaǵy adamnyń alatyn orny. Ol turǵydan kelgende de bizdiń Elbasynyń alatyn orny, jalpy Qazaqstan úshin jasaǵan jańalyqtary, sonyń barlyǵy tarihta jazylyp tur. Sondyqtan, biz muny jai ǵana eskertkish dep qaraýǵa bolmaidy. Muny biz shyn máninde, ádilettiliktiń, sabaqtastyqtyń jáne alǵa órleýdiń alǵy sharty dep qaraýymyz kerek, – dedi QR Parlamenti Májilisiniń depýtaty Darhan Myńbai.
