قازاقستان حالىق ءارتىسى، مەملەكەت جانە قوعام قايراتكەرى ءاسانالى ءاشىموۆ، قازاقستان رەسپۋبليكاسى مەملەكەتتىك ەلتاڭبا اۆتورى جانداربەك مالىبەكوۆ، «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ءتوراعاسى ءومىرزاق وزعانبايەۆ، قازاقستان ۇلتتىق عىلىم اكادەمياسىنىڭ پرەزيدەنتى، اكادەميك، پروفەسسور مۇرات جۇرىنوۆ، ق ر پارلامەنتى ءماجىلىسىنىڭ دەپۋتاتى دارحان مىڭباي، جازۋشى، تۇركىستان وبلىسىنىڭ «قۇرمەتتى ازاماتى» مارحابات بايعۇت، قالامگەر، حالىقارالىق «الاش» ادەبي سىيلىعىنىڭ لاۋرەاتى، قوعام قايراتكەرى كوپەن امىربەك، ءمۇسىنشى تىلەۋبەردى بيناش الدىمەن «ساپار ورتالىعىندا» بولىپ، مۇنداعى جادىگەرلەرمەن تانىستى. قازاقتىڭ تاريحىنان سىر شەرتكەن بەينەبايان تاماشالاپ، تاريحي مەكەن تۋرالى تىڭ دەرەكتەرمەن تانىستى.
– مەن ءوزىم كەنتاۋدا ءوستىم. ول كەزدەگى تۇركىستان مەن قازىرگى شاھاردىڭ ايىرماشىلىعى كوپ. كوركەيىپ، مۇلدەم وزگەرىپ كەتكەن. بۇكىل مۇسىلمان قاۋىمى ءۇشىن ەكىنشى مەككە سانالاتىن كيەلى تۇركىستان قالاسى ەندى تۋريستىك باعىتتا داميدى. جاڭادان اشىلعان نىساندار سونىڭ باستاماسى. سونىمەن قاتار، بۇل قاسيەتتى مەكەندە قانشاما ۇلىلارىمىزدىڭ، حاندار مەن بيلەرىمىزدىڭ سۇيەگى جاتىر. تۇركىستان ەسكەرتكىشتەر قالاسى بولۋى كەرەك. ءابۋ-ناسىر ءال فارابيدەن باستاپ بارلىق تۇلعالارىمىز ءبىر-بىرىن تولىقتىرىپ، جالعاستىرىپ تۇرۋى ءتيىس، – دەدى قازاقستان حالىق ءارتىسى، مەملەكەت جانە قوعام قايراتكەرى ءاسانالى ءاشىموۆ.
تۇرلەنگەن تۇركىستان قالاسىنىڭ جاڭا كەلبەتىمەن تانىسقان دەلەگاسيا رۋحاني استاناداعى قوجا احمەت ياساۋي كەسەنەسىنە بارىپ، بابالار رۋحىنا قۇران باعىشتاپ، ەلدىڭ اماندىعى ءۇشىن دۇعا جاسادى. ارى قاراي جاڭارعان شاھاردىڭ بۇگىنگى كەلبەتىن تاماشالادى. شاھاردىڭ اكىمشىلىك-ىسكەرلىك ورتالىعىنداعى ن.نازاربايەۆ الاڭىنا قويىلعان «ۇلى دالانىڭ ۇلى» اتتى ەلباسى ەسكەرتكىشىنىڭ اشىلۋ راسىمىنە قاتىستى.
– ەلىمىزدە 30 جىلدىڭ ىشىندە جاسالعان تۇبەگەيلى وزگەرىستەر، ۇلى ىستەر تۋرالى سىزدەر جاقسى حاباردارسىزدار. وسى جاسالعان جۇمىستىڭ بارلىعى تىكەلەي ەلباسىنىڭ اتىمەن بايلانىستى. وسىدان تۋرا 3 جىل بۇرىن تۇركىستان وبلىسىن قۇرىلىپ، تۇركىستان قالاسىن كۇللى تۇركى الەمىنىڭ ورتالىعىنا اينالدىرۋعا مۇمكىندىك بەرەتىن ۇلى جۇمىستار باستالدى. نۇرسۇلتان ءابىش ۇلى ساليقالى ساياساتىنىڭ ارقاسىندا بۇكىل الەمدە قازاقستاننىڭ بەدەلى ءوستى. مىنەكەي، وسىنىڭ بارلىعى ەلباسىنىڭ كورەگەندىگىنىڭ جەمىسى، ەلدىڭ ابىرويىنىڭ بۇكىل الەمگە تاڭىلعانىنىڭ كورسەتكىشى، – دەدى ءوز سوزىندە «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ءتوراعاسى ءومىرزاق وزعانبايەۆ.
– ەڭ ۇلىسى، مەن ويلايمىن، ول – تاريح. سول تاريحتاعى ادامنىڭ الاتىن ورنى. ول تۇرعىدان كەلگەندە دە ءبىزدىڭ ەلباسىنىڭ الاتىن ورنى، جالپى قازاقستان ءۇشىن جاساعان جاڭالىقتارى، سونىڭ بارلىعى تاريحتا جازىلىپ تۇر. سوندىقتان، ءبىز مۇنى جاي عانا ەسكەرتكىش دەپ قاراۋعا بولمايدى. مۇنى ءبىز شىن مانىندە، ادىلەتتىلىكتىڭ، ساباقتاستىقتىڭ جانە العا ورلەۋدىڭ العى شارتى دەپ قاراۋىمىز كەرەك، – دەدى ق ر پارلامەنتى ءماجىلىسىنىڭ دەپۋتاتى دارحان مىڭباي.
ەسكەرتكىش ەلىمىزدىڭ تۇڭعىش پرەزيدەنتى – ەلباسى ن.نازاربايەۆتىڭ ەگىس القابىندا تۇسكەن فوتوسۋرەتىنە قاراپ جاسالعان. ءمۇسىننىڭ كومپوزيسياسىندا «ۇلى دالانىڭ ۇلى» اتتى ەلباسى ەسكەرتكىشىندە قارت قاراتاۋدىڭ سۇلباسى بەينەلەنگەن. اۆتور ەلباسىنىڭ قاراتاۋ جازىعىندا شەكسىز دالاعا بايىپپەن قاراعان ءساتىن سۋرەتتەگەن. ەلباسىنا ەسكەرتكىش قويۋ تۋرالى باستامانى جەرگىلىكتى كاسىپكەر بولاتبەك الييەۆ كوتەرىپ، اتالعان يدەياعا تۇركىستاندىق ارداگەر-اقساقالدار، زيالى قاۋىم وكىلدەرى، ءماسليحات دەپۋتاتتارى مەن كاسىپكەرلەر، قوعامدىق ۇيىم وكىلدەرى قولداۋ ءبىلدىردى. وبلىس اكىمىنە ۇندەۋ جازعان تۇرعىنداردىڭ وتىنىش-تىلەكتەرى ورتالىق مەملەكەتتىك ورگاندار كەلىسىمىمەن جۇزەگە استى.
