Qazaqstanda jyl basynan beri mas kúiinde kólik júrgizgen júrgizýshilerdiń qatysýymen bolǵan jol-kólik oqiǵalarynan 212 adam jaraqat aldy. Osyǵan bailanysty Ishki ister ministrligi mundai quqyq buzýshylarǵa qatysty jazany jeńildetýge nemese júrgizýshi kýáliginen aiyrý merzimin qysqartýǵa qarsy ekenin málimdedi, dep habarlaidy dalanews.kz.
Másele Májiliste ákimshilik jáne qylmystyq raqymshylyq týraly zań jobasyn talqylaý barysynda kóterildi. Ishki ister ministriniń orynbasary Sanjar Ádilovtiń aitýynsha, mas júrgizýshilerdiń qatysýymen bolatyn jol apattary áli de kúrdeli másele bolyp qalyp otyr.
«Tek biylǵy bes aidyń ishinde mas júrgizýshilerdiń kinásinen 144 jol-kólik oqiǵasy tirkeldi. Sonyń saldarynan tórt adam qaza taýyp, 212 adam túrli dene jaraqatyn aldy», - dedi Ádilov.
Onyń málimetinshe, ótken jyly elimizde mas kúiinde kólik basqarǵan júrgizýshilerdiń qatysýymen 673 jol apaty bolǵan. Apattar saldarynan 56 adam kóz jumǵan, olardyń arasynda bir bala bar.
Ministr orynbasary jol qozǵalysy qaýipsizdigin qamtamasyz etý máselesinde vedomstvonyń ustanymy ózgermeitinin atap ótti. Onyń aitýynsha, alkogoldik nemese esirtkilik masań kúide kólik júrgizý azamattardyń ómiri men densaýlyǵyna tikelei qaýip tóndiredi jáne aýyr zardaptarǵa ákeletin jol apattarynyń negizgi sebepteriniń biri sanalady.
«Ishki ister ministrliginiń ustanymy ózgermeidi jáne birjaqty. Bul máselede qandai da bir jeńildik jasaýǵa bolmaidy», - dedi ol.
Ádilovtiń sózinshe, qazirgi tańda ministrlik joldaǵy qaýipsizdikti kúsheitý jáne mas kúiinde kólik basqarýǵa qatysty «nóldik tózimdilik» qaǵidatyn ustanyp otyr. Sondyqtan mundai quqyq buzýshylyq úshin belgilengen jaýapkershilikti jeńildetý máselesi qarastyrylmaidy.
«Alkogoldik nemese esirtkilik masań kúide kólik quralyn basqarý azamattardyń ómiri men densaýlyǵyna joǵary qaýip tóndiredi ári aýyr saldarǵa ákeletin jol-kólik oqiǵalarynyń basty sebepteriniń biri bolyp tabylady. Osy baǵyttaǵy jumysymyz mas kúiinde kólik júrgizýge qatysty nóldik tózimdilik qaǵidatyn qamtamasyz etýge baǵyttalǵan», - dep túiindedi ministrdiń orynbasary.
