Aqtóbede joldaǵy janjal adam urlaý deregimen aiaqtaldy. Bir top azamat er adamdy kúshtep Lexus avtokóliginiń júksalǵyshyna salyp áketken. Kúdiktiler ustalyp, olarǵa qatysty sotqa deiingi tergeý bastaldy, dep habarlaidy dalanews.kz.
Aqtóbe oblystyq politsiia departamentiniń málimetinshe, "102" arnasyna birneshe adamnyń er azamatty kúshtep kóliktiń júksalǵyshyna salyp, belgisiz baǵytqa alyp ketkeni týraly habarlama túsken. Oqiǵa sáti sol mańnan ótip bara jatqan kóliktiń beinetirkeýishine túsip qalǵan. Bul jazba politsiiaǵa kúdiktilerdi anyqtaýǵa jáne oqiǵanyń mán-jaiyn jedel anyqtaýǵa múmkindik bergen.
Jedel-izdestirý sharalary barysynda arnaiy maqsattaǵy jasaqtyń qoldaýymen kúdiktiler mingen kólik toqtatylyp, ishindegi adamdar ustaldy.
Aldyn ala málimet boiynsha, oqiǵaǵa jol ústinde bolǵan janjal sebep bolǵan. Jaiaý júrginshiler ótkelimen ótip bara jatqan er adam júrgizýshige eskertý jasaǵannan keiin olardyń arasynda sózge kelispeýshilik týǵan.
Politsiianyń málimetinshe, keiin kúdiktiler jábirlenýshiniń úiiniń mańyna baryp, ony kútken. Er adam taksimen shyqqan sátte olar kólikpen jolyn bógep, taksidi toqtatqan. Osydan keiin jábirlenýshini kúshtep kólikten shyǵaryp, Lexus avtokóliginiń júksalǵyshyna salyp alyp ketken.
Qazirgi ýaqytta atalǵan derek boiynsha adam urlaý faktisimen sotqa deiingi tergeý júrgizilip jatyr. Kúdiktiler ýaqytsha ustaý izoliatoryna qamalyp, tergeý amaldary jalǵasýda.
