Qazaqstannyń jańa saiasi júiege kóshýi, Quryltaidyń jumysy, prezident ókilettiginiń kúsheiýi jáne Ulttyq qor qarajatyn paidalaný máselesi biylǵy Prezident Joldaýynda basty taqyryptardyń qatarynda bolýy múmkin, dep habarlaidy dalanews.kz.
Qoǵam qairatkeri Qazybek Beisebaevtyń pikirinshe, biylǵy Joldaýdyń negizgi ereksheligi – onyń jańa Konstitýtsiia qabyldanyp, eldiń saiasi júiesi ózgergennen keiin ótýinde.
Sarapshynyń aitýynsha, bilik bul kezeńdi Qazaqstannyń «jańa saiasi dáýirge» qadam basýy retinde sipattaýy múmkin. Jańa Konstitýtsiia, Quryltaidyń qurylýy, Parlament júiesiniń ózgerýi jáne bolashaqtaǵy Halyq keńesi týraly máseleler Joldaýda aitylýy yqtimal.
«Negizgi ereksheligi – jańa Konstitýtsiia, jańa saiasi júie, jańa dáýir. Biz bolashaqqa qadam jasap otyrmyz dep aitylady. Qazir eki palataly Parlamenttiń ornyna Quryltai keldi, Halyq keńesi týraly da másele bar. Sondyqtan bilik muny jańa Qazaqstannyń jańa qurylymy retinde kórsetedi», – dedi Qazybek Beisebaev.
Sonymen qatar qoǵam qairatkeri saiasi reformalardyń taǵy bir qyryna nazar aýdardy. Onyń pikirinshe, jańa Konstitýtsiiadaǵy ózgerister prezidenttiń ókilettigin aitarlyqtai kúsheitti.
«Menińshe, jai ǵana saiasi ózgeris boldy dep aitý jetkiliksiz. Jańa Konstitýtsiiaǵa qarasaq, prezidenttiń ókileti kúsheidi. Qazir prezident bilik tarmaqtarynyń basshylaryn ózi taǵaiyndaidy nemese usynady. Mysaly, buryn Májilis tóraǵasyn depýtattardyń ózderi sailaityn. Al jańa júiede Quryltai prezident usynǵan kandidatýrany eki ret qabyldamasa, Quryltai taratylýy múmkin», – dedi ol.
Beisebaevtyń sózinshe, sondyqtan Joldaýda «saiasi reforma», «jańa dáýir», «jańa júie» degen uǵymdar jii aitylǵanymen, qoǵam úshin osy reformalardyń naqty saiasi saldaryn túsiný mańyzdy.
Onyń pikirinshe, jańa júieniń qalai jumys isteitini, Quryltaidyń ókileti qandai bolatyny jáne Halyq keńesi naqty qalai qurylatyny da qoǵam úshin mańyzdy suraq bolyp otyr.
«Qazaqstan Halyq keńesi týraly ázirge tolyq aqparat joq. Onyń quramyna kimder kiredi, qalai qurylady, qandai ókileti bolady – osy máselelerge de Joldaýda bir-eki aýyz sóz aitylýy múmkin», – dedi qoǵam qairatkeri.
Sarapshy ekonomikalyq máseleler de biylǵy Joldaýdyń mańyzdy bóligi bolady dep sanaidy. Ásirese Ulttyq qor qarajatyn paidalaný týraly másele qoǵam nazarynda.
Onyń aitýynsha, buǵan deiin Ulttyq qordaǵy qarajat bolashaq urpaqtyń qory retinde qarastyrylyp keldi. Sondyqtan ony ekonomikany damytýǵa baǵyttaý týraly sheshim qabyldansa, qarajattyń qandai maqsatqa jáne qandai mehanizmmen jumsalatyny mańyzdy.
«Ulttyq qordyń aqshasy – bolashaq urpaqtyń aqshasy dep aityp keldik. Endi ony alyp, paidalaný týraly sóz bolyp otyr. Eń basty suraq – ol aqsha qalai jumsalady? Oǵan qandai baqylaý bolady? Qazaqstandaǵy eń úlken máselelerdiń biri – jemqorlyq. Sondyqtan Ulttyq qor qarajatyn paidalaný kezinde baqylaý máselesi óte mańyzdy», – dedi Beisebaev.
Qoǵam qairatkeri Almatydaǵy Kókjailaý aýmaǵynda salynyp jatqan taý shańǵysy kýrortyna qatysty ekologiialyq máseleni de nazardan tys qaldyrmaý kerektigin aitty. Onyń pikirinshe, iri infraqurylymdyq jobalar ekonomikalyq paidasymen qatar tabiǵatqa yqtimal áseri turǵysynan da baǵalanýy tiis.
«Men Almatyda turǵandyqtan, Kókjailaýdaǵy jaǵdaiǵa da nazar aýdaramyn. Buǵan deiin prezident ol jerde qurylys bolmaidy degen edi, qazir jumystar bastaldy. Mundai jobalardyń ekologiiaǵa áseri qandai bolady degen suraq bar. Bul da qoǵam úshin mańyzdy másele», – dedi ol.
Beisebaevtyń aitýynsha, Qazaqstannyń halyqaralyq jaǵdaiy men syrtqy saiasattaǵy ustanymy da Joldaýdyń mańyzdy baǵyttarynyń biri bolýy múmkin.
Sarapshy qazirgi geosaiasi ahýal barlyq memleketke áser etip otyrǵanyn atap ótip, Qazaqstannyń halyqaralyq arenadaǵy orny, eldiń syrtqy saiasattaǵy baǵyty jáne jańa jaǵdaidaǵy ulttyq múddelerdi qorǵaý máseleleri de prezidenttiń sózinde kórinis tabýy múmkin ekenin aitty.
Osylaisha, Qazybek Beisebaev biylǵy Joldaýdyń basty ereksheligi jańa saiasi júieniń iske qosylýymen bailanysty bolatynyn atap ótti. Onyń pikirinshe, qoǵam úshin «jańa dáýir» týraly jalpy urandardan bólek, bilik tarmaqtarynyń araqatynasy, prezident ókiletiniń shegi, Quryltaidyń róli, Ulttyq qor qarajatynyń jumsalýy jáne iri jobalardyń qoǵam men tabiǵatqa áseri siiaqty naqty máselelerge jaýap mańyzdy.
