Qyzylorda qalasyndaǵy munai óńdeý zaýyty aýmaǵynda iri órt boldy. Jalpy kólemi 120 tonna munai ónimderi saqtalǵan eki rezervýar otqa orandy, dep habarlaidy dalanews.kz.
Tótenshe jaǵdailar qyzmetiniń málimetinshe, árqaisysynyń syiymdylyǵy 60 tonna bolatyn eki rezervýar ashyq jalynmen janǵan. Órt shyqqan orynnyń mańynda taǵy úsh rezervýar ornalasqandyqtan, tilsiz jaýdyń olarǵa taralý qaýpi týyndaǵan.
Oqiǵa ornyna jetken órt sóndirýshiler birneshe qyzmettiń kúshteri men quraldaryn jumyldyrǵan.
«Órtti sóndirý shtaby quryldy. Kórshiles rezervýarlardy qorǵaý úshin lafettik oqpandar ornatylyp, kóbikpen sóndirý jumystary júrgizildi. Nátijesinde órttiń taralýyna jol berilmei, jaqyn mańdaǵy úsh rezervýar saqtalyp qaldy», – dep habarlady TJD ókilderi.
Órttiń jalpy aýmaǵy shamamen 200 sharshy metrdi qamtyǵan. Qazirgi ýaqytta jalyn tolyq sóndirildi.
Aldyn ala málimet boiynsha, zardap shekkender týraly aqparat joq.
