Astanada Almatynyń burynǵy ákimi, «Nur Otan» partiiasy tóraǵasynyń eks-orynbasary Baýyrjan Baibekke tiesili qymbat saǵattardyń joǵalýyna qatysty tergeý jalǵasyp jatyr. Quqyq qorǵaý organdaryna aryzben onyń jubaiy Janar Baibek júgingen, dep habarlaidy dalanews.kz.
Aldyn ala málimet boiynsha, urlyqqa 31 jastaǵy er adam qatysy bolýy múmkin. Ol buryn Baibektiń kómekshisiniń kómekshisi bolyp jumys istegen, dep jazdy jýrnalist Mihail Kozachkov.
Tergeý málimetinshe, kúdikti tek saǵattardy alyp ketip qana qoimai, olardyń ornyna aldyn ala daiyndaǵan kóshirmelerin qaldyrǵan. Alaida ýaqyt óte kele úi ieleri túpnusqalardyń aýystyrylǵanyn baiqap, politsiiaǵa habar bergen. Joǵalǵan buiymdardyń qatarynda Breguet, Blancpain, Hublot, Jaeger-LeCoultre jáne A. Lange & Söhne sekildi álemdik brendterdiń saǵattary bar. Olardyń quny ondaǵan million teńgemen baǵalanýda.
Janar Baibek óz aryzynda 2022 jyldyń naýryzynda balalarymen birge Qazaqstannan ketkenin, keiin 2024 jyly elge qysqa merzimge kelip ketkenin, al jaqynda qaita oralǵanda joǵalǵan zattardy anyqtaǵanyn kórsetken. Onyń málimetinshe, jalpy quny 170 million teńge bolatyn segiz saǵat joǵalǵan. Tergeý barysynda Baibektiń kómekshisi Maqsat jáne onyń kómekshisi Nurbolattyń aty atalǵan. Nurbolat Astanadaǵy elitalyq turǵyn úi keshenderiniń birinde ornalasqan páterge erkin kirip-shyǵýǵa múmkindik alǵan.
Suhbat barysynda Nurbolat saǵattardy aýystyrǵanyn moiyndaǵanymen, segiz emes, tek tórt saǵatqa qatysty áreket jasaǵanyn aitqan. Sonymen qatar ol bul buiymdardy satyp jibergenin jetkizgen. Tergeý kezinde saǵattardy satyp alǵan adamnan tárkilengen telefondaǵy hat-habarlar alty saǵattyń satylǵanyn rastaityn derekterdi kórsetken. Osyǵan bailanysty tergeýshiler naqty qansha saǵattyń joǵalǵanyn jáne olardyń jalpy qunyn anyqtap jatyr.
Qazir kúdikti ýaqytsha ustaý izoliatoryna qamaldy. Oǵan asa iri kólemdegi urlyq baby boiynsha aiyp taǵylyp otyr. Qazaqstan zańnamasyna sáikes, mundai qylmys úshin múlki tárkilenip, 5 jyldan 10 jylǵa deiin bas bostandyǵynan aiyrý jazasy kózdelgen.
