Imanqulovtyń habaryna qaraǵanda, 14 maýsymda saǵat 18.04-te Qaraǵandy oblystyq TJD Órt sóndirý jáne apat-qutqarý qyzmetine Jezqazǵan qalalyq TJB-den ońtústik-batys baǵytqa qaraı 20 shaqyrym jerde ornalasqan Talap aýylynda "Baıqońyr" ǵarysh aılaǵynan qulaıdy dep josparlanǵan aımaqqa «Soıýz-2.1a» zymyran tasyǵyshynyń «Progres MS-06» ǵarysh kemesiniń ajyratylatyn bóligi qulaýynan dalada órt shyqqany jaıly habar túsken.
– Oqıǵa ornynda RF "Mashınostroenıe" ǵylymı óndiristik birlestigi" áskerı óndiristik korporasıasy AQ №1 Bazasynyń 5 dana tehnıkasy jumys istep jatyr, taǵy 3 dana tehnıka tartylady, qomsymsha kómek qajet emes, – delingen habarlamada.
Sonymen qatar, Qaraǵandy oblystyq TJD Órt sóndirý jáne apat-qutqarý jumystary qyzmetteriniń №2 jasaǵynyń ortalyq pýnktine Talap aýylynyń turǵynynan Jezqazǵan – Qyzylorda tasjolynyń mańyndaǵy dalada órt shyqqany jaıly habar túsken.
Osy habarlama boıynsha saǵat 19.27-de Órt sóndirý qyzmetiniń kezekshi aýysymyndaǵy kúshterdi jóneltý týraly sheshim qabyldanǵan. Oqıǵa orny shamamen 40 shaqyrymda boldy.
«Oqıǵa ornynda Talap aýylynan 16 shaqyrym jerde Jezqazǵan – Qyzylorda tasjolynyń ońtústiginde 15 shaqyrymǵa sozylǵan jerdiń órtenip jatqany anyqtaldy, tasjoldyń boıynda qoıý tútin shyqty, órttiń aýmaǵy belgisiz boldy, ońtústik-batystan soqqan jeldiń óti sekýndyna 15-20 metrge jetken. Keıin josparly túrde sóndirý boıynsha sharalar qabyldandy», - dep habarlady TJK ókilderi.
Órttiń saldarynan zymyran tasyǵyshtarynyń bólikterin jınaý boıynsha jumys atqaryp júrgen 1964 jylǵy azamat kúıik shalyp, qaza tapty, taǵy bir 1968 jylǵy azamat aýrýhanaǵa jetkizilgen.
Órtti sóndirýge 61 adam jáne tehnıkanyń 22 danasy jumyldyrylǵan. Osylaısha órt 03.31-de sóndirilgen. «Messendjerlerde zymyran tasyǵyshtyń ajyratylǵan bóliginde geptıl bar degen málimet rastalmady», – dedi Rýslan Imanqulov.
