Áleýmettik jelilerde Jezqazǵan qalasyn abattandyrý kezinde jasandy gazon tóseý máselesi qyzý talqylanyp jatyr. Talqyǵa negiz bolǵan videoda qala aýmaǵyn kógaldandyrý jumystary barysynda tabiǵi shóptiń ornyna jasandy jabyn qoldanylyp jatqany kórsetilgen, dep habarlaidy dalanews.kz.
Video avtorynyń pikirinshe, mundai tásil shynaiy kógaldandyrýdyń ornyn basa almaidy.
«Tiri, ekologiialyq taza ári uzaq merzimdi jasyl jelektiń ornyna damýdyń arzan jasandy kórinisi jasalyp jatyr», – deidi ol.
Turǵyndardyń aitýynsha, tabiǵi shópti sýaryp, baptaǵannan góri, daiyn «kógaldy» jaiyp qoiý áldeqaida tiimdi kóringen bolýy kerek.
Alaida tabiǵat bul sheshimmen kelispei, alǵashqy jeldiń ózinde-aq «dekoratsiianyń» betin ashyp berdi.
Al áleýmettik jeli qoldanýshysy Rinat Bikaevtyń málimetinshe, Jezqazǵan ákimdigi biýdjetti naqtylaý barysynda qala aýmaǵyna jasandy gazon tóseýge 30 mln 176 myń teńge bólýdi josparlaǵan.
Sýret: instagram.com/rinat.bikaev.law
Onyń aitýynsha, jasandy jabynnyń bir sharshy metriniń ortasha quny shamamen 800-1000 teńge aralyǵynda. Bul qarjyǵa qala aýmaǵynda 30 myń sharshy metrden astam jerge jasandy gazon tóselýi múmkin.
Jeli qoldanýshylarynyń bir bóligi bul bastamany synǵa alyp, qarajatty tabiǵi kógaldandyrýǵa, aǵash otyrǵyzýǵa jáne turaqty jasyl aimaqtardy damytýǵa jumsaý tiimdirek bolar edi degen pikir bildirýde.
«Bul kógaldandyrý emes, biýdjet qarjysyna jasalǵan sándik dekoratsiia ǵana. Jasandy gazon kóleńke de bermeidi, aýany da salqyndatpaidy, ekologiialyq áseri de joq», – dep jazdy áleýmettik jelidegi pikir ieleriniń biri.
Sonymen qatar, keibir turǵyndar óńirdiń qurǵaq klimaty men sý tapshylyǵyn eskersek, jasandy jabynnyń kútimi jeńil ári únemdi bolýy múmkin ekenin alǵa tartýda.
Qazirgi ýaqytta video men oǵan qatysty pikirler áleýmettik jelilerde keńinen tarap, turǵyndar arasynda túrli kózqaras týǵyzdy. Al Jezqazǵan ákimdigi bul máselege qatysty resmi túsinikteme bergen joq.
