Jezqazǵan qalasynyń ákimi Qairat Shaijanov qyzmetinen ketti. Ol bul laýazymda tórt jylǵa jýyq jumys istedi, dep habarlaidy dalanews.kz.
Qairat Shaijanov óziniń qyzmetten ketkenin Instagram paraqshasynda habarlap, qala turǵyndaryna alǵys aitty.
«Osy jyldar ishinde biz kóptegen máselelerdi birge sheship, túrli bastamalardy júzege asyrdyq. Syn bizdi shyńdai tústi. Jezqazǵan men úshin jai ǵana jumys istegen qala emes. Bul – taǵdyrym, eńbegim men estelikterimmen bailanysty týǵan jerim. Qyzmetim aiaqtalǵanymen, Jezqazǵanǵa degen janashyrlyǵym eshqashan taýsylmaidy», – dep jazdy ol.
49 jastaǵy Qairat Shaijanov qurylysshy jáne zańger mamandyqtary boiynsha bilim alǵan. Memlekettik qyzmetke deiin qurylys kompaniialarynda basshylyq qyzmetter atqarǵan. Ár jyldary Sátbaev qalasyndaǵy Jezqazǵan kentiniń ákimi, Sátbaev ákiminiń orynbasary jáne Jezqazǵan ákiminiń keńesshisi bolǵan.
Ol Jezqazǵan qalasynyń ákimi bolyp 2022 jyldyń maýsymynda taǵaiyndaldy. Sol jyly Ulytaý oblysy qurylǵan edi.
