Qazaqstanda WhatsApp messendjeri arqyly taraǵan «zeinetkerlerge sanatorii joldamasy úshin 30 AEK qaitarylady» degen aqparat shyndyqqa janaspaidy, dep habarlaidy Dalanews.kz.
Habarlamada ne delingen?
«Qurmetti zeinetkerler! Sanatorlyq-kýrorttyq emdeýge arnalǵan jeńildikter erejesi bekitildi. Endi sizder Qazaqstannyń kez kelgen sanatoriiasyna bara alasyzdar. Joldamanyń tolyq qunyn tólep, ol jerden túbirtek, tólem shoty, jeke kýáliktiń kóshirmesin alyp, bank nemese poshta arqyly shot ashyp, barlyq qujatty áleýmettik qorǵaý bólimine tapsyrý qajet. Olar sizge 30 AEK, iaǵni 117 960 teńge qaitarady», – delingen habarlamada.
BQO sheneýnikteri ne deidi?
Alaida bul aqparatty Batys Qazaqstan oblysynyń jumyspen qamtýdy úilestirý jáne áleýmettik baǵdarlamalar basqarmasy joqqa shyǵardy. Olar mundai jeńildik te, arnaiy baǵdarlama da joq ekenin aitty.
«Mundai jalǵan aqparattar saldarynan azamattardan kelip túsetin ótinishter kúrt kóbeidi. Zeinetkerlerge naqty aqparatty eGov portaly nemese jergilikti jumyspen qamtý ortalyqtary arqyly naqtylap alǵan jón», – dep málimdedi vedomstvo.
Olar 2023 jyly máslihat zeinetkerlerge sanatorii joldamasynyń aqysyn óteýge biýdjetten qarjy bólmeý týraly sheshim qabyldaǵanyn eske saldy.
Zeinetker sanatoriige bara ala ma?
Iá, biraq bul tek Mindetti áleýmettik meditsinalyq saqtandyrý júiesi aiasynda ǵana júzege asady. Bul – memleket kepildik bergen tegin meditsinalyq kómek tizimine kiredi.
Ol úshin aldyn ala tólem de, joldamanyń qunyn óteý de talap etilmeidi.
Qalai ótinish berýge bolady?
Emhanaǵa barmai-aq, ótinimdi eGov portaly nemese eGov Mobile qosymshasy arqyly berýge bolady. Ol úshin:
- dárigerdiń joldamasy;
- ońaltýǵa jiberý sebebin rastaityn qujattar qajet.
Qosymsha bastamalar bar ma?
Jaqynda Eńbek jáne halyqty áleýmettik qorǵaý ministrligi zeinet jasyna jetken azamattardyń birinshi toptaǵy múgedek jubaiyna jeke kómekshi bolýyna múmkindik beretin buiryq jobasyn qoǵamdyq talqyǵa shyǵardy.
Qujat qabyldansa, 2026 jyldan bastap zeinetkerler jeke kómekshi retinde tirkelip, arnaiy járdemaqy ala alady.
