Jambyl oblysy Jýaly aýdanynda ornalasqan mektepte uzaq jyl eńbek etken muǵalim zeinetke shyqqannan keiin birden jumystan bosatylyp, oqý jylyn aiaqtaýǵa múmkindik berilmegen. Alaida pedagog sotqa júginip, jumys berýshimen bolǵan daýda jeńip shyqty. Bul týraly Joǵarǵy sottyń baspasóz qyzmeti málimdedi, dep habarlaidy Dalanews.kz.
Muǵalim 1991 jyldan beri mektepte eńbek etip kelgen: alǵashynda uzartylǵan kún tobynyń tárbieshisi, keiin tarih pániniń muǵalimi bolyp jumys istegen. Byltyr jyl sońynda zeinet jasyna tolǵan ol mektep direktorynan oqý jyly aiaqtalǵansha jumysyn jalǵastyrýǵa ruqsat suraǵan. Alaida mektep basshylyǵy bul ótinishke qulaq aspai, pedagogty dereý qyzmetinen bosatqan.
Muǵalim ne talap etti?
Pedagog sotqa júginip, jumysyna qaita ornalastyrýdy, májbúrli túrde jumystan shettetilgen ýaqyt úshin jalaqyny óndirýdi, sondai-aq moraldyq shyǵyndy óteýdi suraǵan.
Sot ne dedi?
Joǵarǵy sot taratqan aqparatqa sáikes, sot mekteptiń áreketinen Eńbek kodeksi, ujymdyq kelisimshart pen salalyq kelisim talaptarynyń óreskel buzylǵanyn anyqtaǵan.
"Jumys berýshi tarapynan eńbek shartyn buzý týraly eskertý zańda belgilengen merzimde berilmegen, jumysshynyń quqyqtary eskerýsiz qalǵan", – delingen habarlamada.
Aýdandyq sot pedagogty burynǵy qyzmetine qaita ornalastyrý, májbúrli túrde jumystan shettetilgen alty ai úshin 2,1 mln teńge kóleminde jalaqy tóleý, sondai-aq 100 myń teńge moraldyq ziian jáne 250 myń teńge advokat shyǵyndaryn óteý týraly sheshim shyǵarǵan.
Sonymen qatar sot aýdandyq bilim bólimine mekteptegi zańbuzýshylyqtar boiynsha jeke uiǵarym joldaǵan.
Mektep direktory bul sheshimmen kelispegenimen, oblystyq sot alǵashqy úkimdi ózgerissiz qaldyrdy.
