Jyl basynan bastap respýblikalyq biýdjetten 3 trln 118,2 mlrd teńge somasyna zeinetaqy tólendi, onyń ishinde bazalyq zeinetaqyǵa 982,2 mlrd teńge, yntymaqty zeinetaqy tólemine 2 trln 136 mlrd teńge qarastyryldy, dep habarlaidy Dalanews.kz.
Eńbek jáne halyqty áleýmettik qorǵaý ministrligi baspasóz qyzmetiniń málimetinshe, 2024 jylǵy 1 qarashadaǵy jaǵdai boiynsha elimizdegi zeinetkerler sany 2 mln 421 myń adamdy quraidy.
2024 jylǵy 1 qarashadaǵy jaǵdai boiynsha, jiyntyq zeinetaqynyń ortasha mólsheri - 131 730 teńge, onyń ishinde:
- yntymaqty zeinetaqy mólsheri – 89 122 teńge,
- bazalyq zeinetaqy – 42 608 teńge.
2018 jylǵy 1 shildeden bastap memlekettik bazalyq zeinetaqy tólemi zeinetaqy júiesindegi ótilin eskere otyryp, ár alýshyǵa jeke taǵaiyndala bastaǵany da naqtylanady.
Bul rette 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary (budan ári – MZJ) tólengen kezeńder zeinetaqy júiesindegi eńbek ótiline qosylady.
"Eger azamattyń zeinetaqy júiesindegi ótili 10 jyl nemese odan az bolsa, sondai-aq múlde joq bolsa, bazalyq zeinetaqy eń tómengi kúnkóris deńgeiiniń 65%-na teń bolsa, sodan keiin 10 jyldan asqan ár jyl úshin onyń mólsheri 2 %-ǵa artady. Al eger sizdiń ótilińiz 20 jyl bolsa, bazalyq zeinetaqy tómengi kúnkóris deńgeiiniń 85 %-yn quraidy. Eńbek ótili 30 jyl nemese odan kóp bolsa, kúnkóris deńgeiiniń eń joǵarǵy mólsherinde iaǵni 105% belgilenedi", delingen habarlamada.
Eger bir ai ishinde mindetti zeinetaqy jarnalary Biryńǵai jinaqtaýshy zeinetaqy qoryna birneshe ret aýdarylsa, jinaqtaýshy júiege qatysý merzimi bir aidy quraidy.
Osylaisha mindetti zeinetaqy jarnalary neǵurlym turaqty jáne tolyq kólemde aýdarylatyn bolsa, zeinet jasyna jetkende bazalyq zeinetaqy tólemderiniń mólsheri soǵurlym kóp bolady.
Óz kezeginde azamattyń jasyna bailanysty zeinetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńdegi ortasha ailyq tabysyna bailanysty bolady.
Buǵan deiin biz Qazaqstan azamattarynyń BJZQ-daǵy jinaǵynyń 2024 jylǵy toǵyz aidaǵy tabysy 2,09 trln teńgeni quraǵanyn jazǵanbyz.
