Zeinet jasyna jetken azamattar zeinetaqyny keshiktirmei rásimdeý úshin turǵylyqty jerindegi HQKO-ǵa ýaqytynda júgingeni jón. Osy arqyly memlekettik biýdjetten tólenetin bazalyq jáne ortaq zeinetaqy, sondai-aq Biryńǵai jinaqtaýshy zeinetaqy qoryndaǵy (BJZQ) jinaqtardy alý rásimdeledi, dep habarlaidy Dalanews.kz.
Qujattardy zeinet jasyna 10 kún qalǵanda tapsyrýǵa bolady. Óitkeni zeinetaqy tólemderi ótinish tirkelgen kúnnen bastap esepteledi. Eger adam zeinet jasyna tolmai turyp ótinish berse, tólemder onyń zeinet jasyna jetken kúninen bastalady. Eń mańyzdysy keshigip júgingen ýaqyt úshin zeinetaqy keri tólenbeidi.
Zeinetaqyny ýaqytynda rásimdeý tabystan aiyrylyp qalmaýdyń kepili. Biýdjetten tólenetin zeinetaqyny taǵaiyndaý úshin eńbek ótili qujattar arqyly muqiiat tekseriledi.
Keibir azamattar memlekettik zeinetaqyny rásimdegenimen, BJZQ-daǵy jinaqtaryn alýǵa ótinish berýdi umytyp ketedi. Mundai jaǵdailardy anyqtaý úshin qor jyl saiyn "Azamattarǵa arnalǵan úkimet" bazasymen derekterdi salystyryp, tólemderdi proaktivti túrde, iaǵni ótinishsiz-aq taǵaiyndaidy. Bul kezde qarajat zeinetaqy rásimdeý kezinde kórsetilgen bank shotyna aýdarylady.
BJZQ tólemderi jinaq tolyq taýsylǵanǵa deiin jalǵasady. Sondyqtan zeinetke shyǵý protsesin keshiktirmei bastap, barlyq tólem túrin tolyq rásimdeý mańyzdy.
