زەينەت جاسىنا جەتكەن ازاماتتار زەينەتاقىنى كەشىكتىرمەي راسىمدەۋ ءۇشىن تۇرعىلىقتى جەرىندەگى حقكو-عا ۋاقىتىندا جۇگىنگەنى ءجون. وسى ارقىلى مەملەكەتتىك بيۋدجەتتەن تولەنەتىن بازالىق جانە ورتاق زەينەتاقى، سونداي-اق ءبىرىڭعاي جيناقتاۋشى زەينەتاقى قورىنداعى (بجزق) جيناقتاردى الۋ راسىمدەلەدى، دەپ حابارلايدى Dalanews.kz.
قۇجاتتاردى زەينەت جاسىنا 10 كۇن قالعاندا تاپسىرۋعا بولادى. ويتكەنى زەينەتاقى تولەمدەرى ءوتىنىش تىركەلگەن كۇننەن باستاپ ەسەپتەلەدى. ەگەر ادام زەينەت جاسىنا تولماي تۇرىپ ءوتىنىش بەرسە، تولەمدەر ونىڭ زەينەت جاسىنا جەتكەن كۇنىنەن باستالادى. ەڭ ماڭىزدىسى كەشىگىپ جۇگىنگەن ۋاقىت ءۇشىن زەينەتاقى كەرى تولەنبەيدى.
زەينەتاقىنى ۋاقىتىندا راسىمدەۋ تابىستان ايىرىلىپ قالماۋدىڭ كەپىلى. بيۋدجەتتەن تولەنەتىن زەينەتاقىنى تاعايىنداۋ ءۇشىن ەڭبەك ءوتىلى قۇجاتتار ارقىلى مۇقيات تەكسەرىلەدى.
كەيبىر ازاماتتار مەملەكەتتىك زەينەتاقىنى راسىمدەگەنىمەن، بجزق-داعى جيناقتارىن الۋعا ءوتىنىش بەرۋدى ۇمىتىپ كەتەدى. مۇنداي جاعدايلاردى انىقتاۋ ءۇشىن قور جىل سايىن "ازاماتتارعا ارنالعان ۇكىمەت" بازاسىمەن دەرەكتەردى سالىستىرىپ، تولەمدەردى پرواكتيۆتى تۇردە، ياعني ءوتىنىشسىز-اق تاعايىندايدى. بۇل كەزدە قاراجات زەينەتاقى راسىمدەۋ كەزىندە كورسەتىلگەن بانك شوتىنا اۋدارىلادى.
بجزق تولەمدەرى جيناق تولىق تاۋسىلعانعا دەيىن جالعاسادى. سوندىقتان زەينەتكە شىعۋ پروسەسىن كەشىكتىرمەي باستاپ، بارلىق تولەم ءتۇرىن تولىق راسىمدەۋ ماڭىزدى.
