Sońǵy ýaqytta áleýmettik jeliler men onlain-habarlandyrý platformalarynda eń tómengi jetkiliktilik sheginen (TJSh) asatyn zeinetaqy jinaqtaryn sheshý boiynsha deldaldyq qyzmetter týraly usynystar qarasy kóbeigen, árine aqysyn tólegen jaǵdaida. Osyǵan qatysty "BJZQ" AQ el azamattaryna alaiaqtar qarmaǵyna ilinip qalmaýdy eskertedi, dep jazady Dalanews.kz.
"BJZQ" AQ óz salymshylary men alýshylaryna mynany eskertedi:
"Zeinetaqy jinaqtaryn alý Qazaqstan Respýblikasynyń Áleýmettik kodeksinde qatań belgilengen jaǵdailarda ǵana múmkin. Eń aldymen, bul zeinet jasyna tolý, 1 nemese 2 toptaǵy merzimsiz múgedektik, shet elge turaqty turýǵa ketý, muragerlik".
Zeinetaqy jinaqtaryn turǵyn úi jaǵdailaryn jaqsartýǵa jáne/nemese emdelýge zańnamamen belgilengen sharttar saqtalǵan jaǵdaida, tómendegi azamattardyń sanaty paidalana alady:
- eń tómengi jetkiliktilik sheginen asatyn jinaqtary bar salymshylar (TJSh-dan asatyn soma sheginde);
- zeinetaqysy joǵalǵan tabystyń (buryn alynǵan jalaqysynyń) keminde 40% quraityn zeinetkerler - olar shotta qalǵan jinaqtarynyń 50% deiin paidalana alady;
- eńbek sińirgen jyldary boiynsha zeinetkerler (jinaqtarynyń 100% deiin paidalana alady);
- zeinetaqy annýiteti shartyn jasasqan salymshylar (jinaqtarynyń 100% deiin paidalana alady).
Zeinetaqy jinaqtaryn turǵyn úige nemese emdelý syndy maqsatty paidalaný tek ýákiletti operatorlar – ekinshi deńgeidegi bankter arqyly múmkin bolady. Tiisinshe, deldaldyq qyzmetter qajet emes. Bul rette BJZQ eshqandai aqy almaidy.
"Kúmándi áreketke qatysýǵa kelise otyryp, siz aqshańyzdy joǵaltý qaýipin týdyryp qana qoimai, bolashaqta basqa alaiaqtyq áreketter úshin paidalanylýy múmkin jeke derekterińizdiń saqtalýyna da qaýip tóndiresiz", - deidi qordaǵylar.
BJZQ óz salymshylary men alýshylaryna mundai usynystardy elemeýge, tek resmi kózderden aqparat alýǵa jáne quqyqtyq turǵydan qorǵalǵan salada ǵana áreket etýge qatań keńes beredi.
