Zeınetaqy jarnalarynyń bir bóligin eń tómengi jetkiliktilik sheginen asatyn jáne bolashaqta eń tómengi zeınetaqy mólsherinen kem bolmaıtyn zeınetaqy tólemderin alýǵa múmkindik beretin jınaqty qalyptastyrǵan salymshylar ǵana paıdalana alady.
"Bul rette azamattardyń paıdalanýy úshin qoljetimdi zeınetaqy jınaqtary tek mindetti zeınetaqy jarnalaryn jáne mindetti kásiptik zeınetaqy jarnalaryn ǵana emes, sondaı-aq, olardy ınvestısıalaýdan alynǵan ınvestısıalyq tabysty da qamtıdy", – deıdi qor mamandary.
Al "Qazaqstan Respýblıkasynda zeınetaqymen qamsyzdandyrý týraly" zańǵa sáıkes, "zeınetaqy jınaqtarynyń eń az jetkiliktilikti shegi" salymshynyń zeınetaqy jınaqtarynyń naqty somasyn, sondaı-aq, onyń bolashaq zeınetaqy jarnalary men ınvestısıalyq tabysyn qamtıdy. Sonyń arqasynda eń tómen zeınetaqydan kem bolmaıtyn zeınetaqy tólemderin jasaýǵa bolady.
"Bul rette bolashaq jarnalardyń eń tómengi jalaqy mólsherinen tómen emes tabystan aýdarylatyny esepke alyndy. Eger kirister joǵary bolsa, onda eń tómengi jetkiliktilik shegi tezirek qalyptasady, al zeınetkerlikke shyqqannan keıingi tólemder eń tómengi zeınetaqydan kóp bolady", – delingen qordyń resmı habarlamasynda.
Jetkiliktilik shegin esepteýge arnalǵan ádisteme men ólshemder úkimet qaýlysymen aıqyndalady jáne árbir jas úshin jeke esepteledi. 2021 jylǵa arnalǵan zeınetaqy jınaqtarynyń eń tómengi jetkiliktilik shekteriniń aldyn ala mólsherin myna silteme arqyly kórýge bolady.
árbir salymshy óz jınaqtarynyń jetkiliktilik shegine sáıkestigin teksere alady. BJZQ-daǵy zeınetaqy shotynan úzindi kóshirmeni enpf.kz saıtyndaǵy jeke kabınetten, BJZQ-nyń jańartylǵan uıaly qosymshasynan nemese egov.kz portalynan onlaın rejimde shyǵarýǵa múmkindik bar. Úzindi kóshirmede jetkiliktilik shegi jáne nysanaly paıdalaný úshin qoljetimdi soma kórsetiledi.
Saıttaǵy jeke kabınette jáne BJZQ uıaly qosymshasynda avtorlanýdyń eki tásili qoljetimdi. Olar:
- elektrondy sıfrlyq qoltańbany paıdalaný;
- JSN men paróldi engizý.
BJZQ derekqorynda tirkelgen elektrondyq poshtamen de turaqty túrde úzindi kóshirme alýǵa bolady.
"BJZQ-daǵy jınaqtar týraly aqparatqa yńǵaıly ári jyldam qol jetkizý úshin Qor Telegram messendjerinde óziniń jeke botyn iske qosty, onyń kómegimen de úzindi kóshirme alýǵa bolady. Ózińizdiń zeınetaqy jınaqtaryńyzdy "BJZQ" AQ óńirlik bólimshelerine jeke basyńyzdy kýálandyratyn qujatpen baryp ta teksere alasyz", – deıdi mamandar.
Al BJZQ bólimsheleri joq shalǵaı aýdandardyń turǵyndary "Qazposhta" AQ-nyń avtorlandyrylǵan bólimshelerine júginip, habarlaýdyń kez kelgen yńǵaıly tásilin tańdaı alady. Poshta bólimshelerin myna jerden kórýge bolady.
