Tanymal qazaqstandyq akter ári rejisser Nurtas Adambaidyń jubaiy Ǵaliia Adambai áleýmettik jelide otbasyndaǵy jaǵdaiǵa qatysty málimdeme jasady. Ol kúieýiniń psiholog Tórebek Bekbaevtyń yqpalyna túskenin aityp, onyń kózqarastary balalar tárbiesine keri áser etip jatqanyn jetkizdi, dep habarlaidy dalanews.kz.
Ǵaliia Adambai Instagram paraqshasynda birneshe jazba jariialap, sońǵy jyldary otbasynda týyndaǵan kelispeýshilikter týraly baiandady. Onyń aitýynsha, Nurtas Adambai psiholog Tórebek Bekbaevtyń bala tárbiesine qatysty ustanymdaryn qoldaidy. Al Ǵaliia bul kózqarastarmen kelispeitinin ashyq bildirgen.
Atap aitqanda, áieliniń sózinshe, rejisser balalardy óz qalaýynan tys eshqandai áreketke májbúrleýge bolmaidy degen qaǵidany ustanady.
Ǵaliia mundai tásildiń kúndelikti turmysta, ásirese balalardyń densaýlyǵy men tamaqtanýyna qatysty máselelerde qiyndyq týdyratynyn málimdedi.
"Úsh jasar balanyń tisin tazalatý úshin kún saiyn kúresýge týra keletin úide ómir súrý – azap. Balalardy durys, qunarly ári paidaly tamaqpen qamtamasyz etý de qiynǵa soǵady", – dep jazdy Ǵaliia.
Onyń aitýynsha, Nurtas Adambai óz densaýlyǵyna erekshe kóńil bólip, durys tamaqtanýǵa, dári-dármekterin ýaqytyly qabyldaýǵa jáne gadjetterdi shekteýge mán beredi. Alaida Ǵaliia kúieýiniń balalar tárbiesine kelgende basqa ustanymda ekenin aityp, osy jaǵdaiǵa narazylyǵyn bildirdi.
Ǵaliia Adambaidyń sózinshe, atalǵan kózqarastarǵa bailanysty otbasynda sońǵy bes jyl boiy túsinispeýshilikter bolǵan. Ol psihologtyń ideialaryn ustanatyn adamdar tobyn "sekta" dep atap, bul qubylysty "tórebekshildik" dep sipattady.
"Sekta osylai jumys isteidi. Áielder men balalar zardap shegedi. Men barlyq qujat pen mamandardyń qorytyndysyn jariialaimyn. Onyń da ýaqyty keledi. Qazir men úshin balalarymnyń jaǵdaiy mańyzdy", – dedi ol.
Sonymen qatar Ǵaliia kúieýiniń keibir áreketteri ózin qaitadan kópshilik aldynda sóileýge májbúr etkenin málimdedi.
"Kúieýimniń "tórebekshildik" sektasynda bolýy maǵan únsiz qalýǵa múmkindik bermei otyr. Óziniń qoqan-loqqysy men oǵash áreketteri arqyly meni qaita sóileýge májbúrlep jatyr", – dep jazdy Ǵaliia.
Ol aldaǵy ýaqytta aitqan sózderin rastaityn qujattar men mamandardyń qorytyndylaryn jariialaýǵa nietti ekenin jetkizdi. Áieldiń aitýynsha, qazirgi basty maqsaty – balalarynyń jaǵdaiyna kóńil bólý.
