Jetisý oblysynda aýyr júk kólikteriniń avtomattandyrylǵan salmaq ólsheý stantsiiasyn ainalyp ótýine múmkindik bergen tehnikalyq jol jabyldy. Zańbuzýshylyq "Saryózek – Kóktal" respýblikalyq mańyzy bar tasjolynyń bir bóliginde anyqtalǵan, dep habarlaidy dalanews.kz.
Buǵan deiin áleýmettik jelide Kerbulaq aýdanyndaǵy tsement tasityn kólikterdiń salmaq baqylaýynan jaltarý úshin ainalma joldy paidalanatyny túsirilgen video tarady. Ony jariialaǵan oblys turǵyny júrgizýshilerdiń baqylaý beketin ashyq ainalyp ótip júrgenin málimdedi.
"Júrgizýshiler basshylyqtyń máseleni sheship beretinin aitady. Arnaiy tehnikalardyń arasynda “QazAvtoJol” logotipi bar tsement tasityn kólikter de kezdesedi. Memleket jol salý men jóndeýge milliardtaǵan teńge bólip jatqanda, mundai jaǵdaiǵa jol berilmeýi kerek", – dedi video avtory.
Kólik prokýratýrasynyń málimetinshe, júrgizýshiler avtomattandyrylǵan ólsheý stantsiiasyna túspeý úshin óndiristik maqsatqa arnalǵan tehnikalyq joldy paidalanǵan. Bas kólik prokýratýrasynyń úilestirýimen "QazAvtoJol" filialynyń arnaiy tehnikasy ainalma baǵyttardy bógegen.
Qazir aýyr júk kólikteri avtomattandyrylǵan salmaq ólsheý kesheni arqyly ótýge mindetti. Jaǵdaidy baqylaý úshin prokýratýra, kóliktik baqylaý inspektsiiasy jáne ákimshilik politsiia qyzmetkerlerinen quralǵan vedomstvoaralyq top jasaqtaldy. Tekserý jumystary aýmaqaralyq qaǵidat boiynsha júrgiziledi.
Sonymen qatar mobildi salmaq ólsheý keshenderiniń sanyn kóbeitý týraly sheshim qabyldanǵan. Quzyrly organdar "QazAvtoJolmen" birge Qonaev qalasynyń kireberisine avtomattandyrylǵan baqylaý júiesin ornatý máselesin de qarastyryp jatyr.
Resmi málimet boiynsha, jyl basynan beri salmaq talaptaryn buzǵan 22 myń tasymaldaýshy ákimshilik jaýapkershilikke tartylyp, olarǵa jalpy somasy 6 mlrd teńge aiyppul salynǵan. Buǵan qosa, kólikterdiń belgilengen mólsherden artyq júk tiep shyǵýyna jol bergen 363 kásipkerlik sýbektisi jaýapqa tartyldy.
Prokýratýra aýyr júk kólikteriniń qozǵalysy men salmaq talaptarynyń saqtalýyna qatysty baqylaý jalǵasatynyn habarlady.
