Iliias Jansúgirov atyndaǵy Jetisý ýniversitetine Italiia Respýblikasynyń Marke politehnikalyq ýniversitetiniń (UNIVPM) rektory Enriko Kýaliarini bastaǵan delegatsiia keldi. Delegatsiiany ýniversitet rektory Ermek Bóribaev qabyldap, eki el arasyndaǵy bilim jáne ǵylym salasyndaǵy yntymaqtastyqty, Jetisý ýniversiteti bazasynda ashylǵan Marke politehnikalyq ýniversiteti filalynyń damýy týraly baiandady. Kezdesý barysynda UNIVPM rektory, professor Enriko Kýaliarini Jetisý jerine kelgenine qýanyshty ekenin jetkizdi, dep habarlaidy dalanews.kz.
"Jetisý ýniversitetimen yntymaqtastyqty joǵary baǵalaimyz. Bul seriktestik stýdentter men oqytýshylar úshin jańa múmkindikter ashyp, eki ýniversitet arasyndaǵy bailanysty odan ári nyǵaita túsedi", – dedi.
Eki ýniversitet basshysy qos diplomdy bilim berý baǵdarlamalaryn iske asyrý týraly kelisimge qol qoidy. Aldaǵy ýaqytta "Aqparattyq júieler – Kompiýterlik injeneriia jáne avtomattandyrý" (bakalavriat), "Ekonomika – Álemdik ekonomika jáne kommertsiia" jáne "Aýyl sharýashylyǵy ǵylymdary men tehnologiialary – Jer jáne aýyl sharýashylyǵy ǵylymdary" (magistratýra) baǵdarlamalary engiziletin boldy.
Resmi jiynda professor Enriko Kýaliarinige halyqaralyq akademiialyq yntymaqtastyqty damytýǵa qosqan úlesi úshin Jetisý ýniversitetiniń "Qurmetti professory" ataǵy berildi.
Delegatsiia ýniversitettiń ǵylymi-zertteý infraqurylymy, UNIVPM filialynyń jumysy jáne zamanaýi zerthanalardyń qyzmetimen tanysty. «Agronomiia» qos diplomdy bilim berý baǵdarlamasynyń stýdentterimen kezdesý ótkizdi. Kezdesý barysynda baǵdarlamanyń júzege asyrylý nátijeleri tanystyryldy. Jańa oqý jylynda atalǵan baǵdarlama boiynsha alǵashqy bes stýdent bilimin jalǵastyrý úshin Italiianyń Ankona qalasyndaǵy Marke politehnikalyq ýniversitetine barady. Biyl «Agronomiia» bilim berý baǵdarlamasynyń 12 stýdenti italian tilinen qarqyndy kýrsty aiaqtap, sertifikattarǵa ie boldy.
Kezdesý aiasynda ýniversitet rektorlary bolashaq urpaqqa arnalǵan úndeý hattar saqtalǵan Ýaqyt kapsýlasyn ornatyp, Marke filialy alleiasyna aǵash otyrǵyzdy. Bul bastamalar bilim men ǵylymdaǵy halyqaralyq áriptestiktiń nyǵaiýyn, urpaqtar sabaqtastyǵyn jáne bolashaqqa degen ortaq senimdi aishyqtai tústi.
