Ýkraina AQSh usynǵan sirek kezdesetin metaldarǵa qatysty jańa kelisimdi maquldady, dep habarlaidy Dalanews.kz.
"Kiev mineraldy resýrstar boiynsha Vashingtonmen kelisimge keldi. <…> AQSh bastapqyda talap etken 500 milliard dollar kólemindegi áleýetti kiristi óz paidasyna alý quqyǵynan bas tartty", – delingen Financial Times materialynda.
Basylym málimetinshe, qujattyń sońǵy nusqasynda AQSh-tyń Ýkrainaǵa "qaýipsizdik kepildikterin" berýi týraly eshqandai ereje qarastyrylmaǵan.
Ýkrainalyq sheneýnikterdiń aitýynsha, Kiev AQSh-pen munai, gaz jáne basqa da mineraldyq resýrstardy birlesip igerý jóninde kelisimge qol qoiýǵa daiyn. Olardyń málimdeýinshe, kelissózder nátijesinde Ýkraina úshin anaǵurlym tiimdi sharttarǵa qol jetkizilgen.
FT gazetiniń qolyna túsken kelisimniń sońǵy mátininde Ýkraina ózine tiesili memlekettik mineraldyq resýrstardy, onyń ishinde munai men gazdy kommertsiialandyrýdan túsken tabystyń 50 paiyzyn arnaiy qorǵa aýdaryp otyrýy tiis ekeni kórsetilgen. Sonymen qatar bul qorǵa logistikalyq operatsiialardan túsken kirister de baǵyttalmaq.
Atalǵan qordyń qarajaty Ýkrainadaǵy investitsiialyq jobalardy qarjylandyrýǵa jumsalady dep josparlanyp otyr. Basylym dereginshe, kelisim qazirdiń ózinde memlekettik biýdjetke tabys ákelip otyrǵan ken oryndaryn qamtymaidy. Buǵan, mysaly, "Naftogaz" jáne "Ýkrnafta" kompaniialarynyń óndiristik kiristeri jatady.
"Ýkrainalyq sheneýnikter kelisimniń ádilet, ekonomika jáne syrtqy ister ministrlikteriniń maquldaýynan ótkenin jáne bul qujat Zelenskiidiń aldaǵy aptalarda Aq úige baryp, Tramppen birge ony resmi túrde bekitýine múmkindik ashatynyn málimdedi", – dep jazady Financial Times.
2025 jyldyń aqpan aiynyń basynda AQSh prezidenti Donald Tramp Vashington kórsetip otyrǵan qarjylai jáne áskeri kómektiń óteýi retinde Ýkrainadan sirek kezdesetin metaldardy jetkizýge kepildik talap etetinin málimdegen edi.
AQSh sheneýnikteri Vladimir Zelenskiige bul kelisimge qol qoiýdy Miýnhendegi qaýipsizdik jónindegi konferentsiia aiasynda vitse-prezident Djei Di Venspen kezdesýde usynǵan bolatyn. Alaida Zelenskii ol kezde qujatqa qol qoiýdan bas tartqan.
Keiinnen Aq úi basshysy Kievtiń kelisimdi buzǵanyn rastady. Onyń sózinshe, ýkrainalyq bilik AQSh qarjy ministri Skott Bessentke dóreki túrde jaýap bergen. Osydan keiin Donald Tramp Ýkrainaǵa tańdaý jasaityn sát kelgenin eskertip, eger kelisimge qol qoiylmasa, munyń saldary aýyr bolýy múmkin ekenin eskertti.
