ۋكراينا اقش ۇسىنعان سيرەك كەزدەسەتىن مەتالدارعا قاتىستى جاڭا كەلىسىمدى ماقۇلدادى، دەپ حابارلايدى Dalanews.kz.

"كييەۆ مينەرالدى رەسۋرستار بويىنشا ۆاشينگتونمەن كەلىسىمگە كەلدى. <…> اقش باستاپقىدا تالاپ ەتكەن 500 ميلليارد دوللار كولەمىندەگى الەۋەتتى كىرىستى ءوز پايداسىنا الۋ قۇقىعىنان باس تارتتى"، – دەلىنگەن Financial Times ماتەريالىندا.

باسىلىم مالىمەتىنشە، قۇجاتتىڭ سوڭعى نۇسقاسىندا اقش-تىڭ ۋكرايناعا "قاۋىپسىزدىك كەپىلدىكتەرىن" بەرۋى تۋرالى ەشقانداي ەرەجە قاراستىرىلماعان.

ۋكراينالىق شەنەۋنىكتەردىڭ ايتۋىنشا، كييەۆ اقش-پەن مۇناي، گاز جانە باسقا دا مينەرالدىق رەسۋرستاردى بىرلەسىپ يگەرۋ جونىندە كەلىسىمگە قول قويۋعا دايىن. ولاردىڭ مالىمدەۋىنشە، كەلىسسوزدەر ناتيجەسىندە ۋكراينا ءۇشىن اناعۇرلىم ءتيىمدى شارتتارعا قول جەتكىزىلگەن.

FT گازەتىنىڭ قولىنا تۇسكەن كەلىسىمنىڭ سوڭعى ماتىنىندە ۋكراينا وزىنە تيەسىلى مەملەكەتتىك مينەرالدىق رەسۋرستاردى، ونىڭ ىشىندە مۇناي مەن گازدى كوممەرسيالاندىرۋدان تۇسكەن تابىستىڭ 50 پايىزىن ارنايى قورعا اۋدارىپ وتىرۋى ءتيىس ەكەنى كورسەتىلگەن. سونىمەن قاتار بۇل قورعا لوگيستيكالىق وپەراسيالاردان تۇسكەن كىرىستەر دە باعىتتالماق.

اتالعان قوردىڭ قاراجاتى ۋكرايناداعى ينۆەستيسيالىق جوبالاردى قارجىلاندىرۋعا جۇمسالادى دەپ جوسپارلانىپ وتىر. باسىلىم دەرەگىنشە، كەلىسىم ءقازىردىڭ وزىندە مەملەكەتتىك بيۋدجەتكە تابىس اكەلىپ وتىرعان كەن ورىندارىن قامتىمايدى. بۇعان، مىسالى، "نافتوگاز" جانە "ۋكرنافتا" كومپانيالارىنىڭ وندىرىستىك كىرىستەرى جاتادى.

"ۋكراينالىق شەنەۋنىكتەر كەلىسىمنىڭ ادىلەت، ەكونوميكا جانە سىرتقى ىستەر مينيسترلىكتەرىنىڭ ماقۇلداۋىنان وتكەنىن جانە بۇل قۇجات زەلەنسكييدىڭ الداعى اپتالاردا اق ۇيگە بارىپ، ترامپپەن بىرگە ونى رەسمي تۇردە بەكىتۋىنە مۇمكىندىك اشاتىنىن مالىمدەدى"، – دەپ جازادى Financial Times.

2025 جىلدىڭ اقپان ايىنىڭ باسىندا اقش پرەزيدەنتى دونالد ترامپ ۆاشينگتون كورسەتىپ وتىرعان قارجىلاي جانە اسكەري كومەكتىڭ وتەۋى رەتىندە ۋكراينادان سيرەك كەزدەسەتىن مەتالداردى جەتكىزۋگە كەپىلدىك تالاپ ەتەتىنىن مالىمدەگەن ەدى.

اقش شەنەۋنىكتەرى ۆلاديمير زەلەنسكييگە بۇل كەلىسىمگە قول قويۋدى ميۋنحەندەگى قاۋىپسىزدىك جونىندەگى كونفەرەنسيا اياسىندا ۆيسە-پرەزيدەنت دجەي دي ۆەنسپەن كەزدەسۋدە ۇسىنعان بولاتىن. الايدا زەلەنسكيي ول كەزدە قۇجاتقا قول قويۋدان باس تارتقان.

كەيىننەن اق ءۇي باسشىسى كييەۆتىڭ كەلىسىمدى بۇزعانىن راستادى. ونىڭ سوزىنشە، ۋكراينالىق بيلىك اقش قارجى ءمينيسترى سكوتت بەسسەنتكە دورەكى تۇردە جاۋاپ بەرگەن. وسىدان كەيىن دونالد ترامپ ۋكرايناعا تاڭداۋ جاسايتىن ءسات كەلگەنىن ەسكەرتىپ، ەگەر كەلىسىمگە قول قويىلماسا، مۇنىڭ سالدارى اۋىر بولۋى مۇمكىن ەكەنىن ەسكەرتتى.