Qazaqstandyqtar endi Biryńǵai jinaqtaýshy zeinetaqy qoryndaǵy jinaqtarynyń 100 paiyzyna deiingi bóligin investitsiialyq portfeldi basqarýshy kompaniialarǵa senip tapsyra alady. Bul týraly Nartai Aralbaiuly Instagram paraqshasynda habarlady, dep habarlaidy dalanews.kz.
Nartai Aralbaiulynyń aitýynsha, qazirgi ýaqytta azamattardyń jalaqysynan ustalatyn 10 paiyzdyq mindetti zeinetaqy jarnasynan jinalǵan qarajattyń basym bóligin Ulttyq bank basqarady. Zeinetaqy aktivteri memlekettik baǵaly qaǵazdarǵa, qarjy uiymdarynyń quraldaryna jáne basqa da investitsiialyq baǵyttarǵa ornalastyrylady.
Jańa ózgeris azamattarǵa jinaǵynyń qansha bóligin jáne qai uiymǵa senip tapsyratynyn óz betinshe sheshýge múmkindik beredi. Salymshy arnaiy ótinish berip, zeinetaqy qarajatyn investitsiialaityn bir nemese birneshe basqarýshy kompaniiany tańdai alady.
"Endi zeinetaqy jinaǵyńyzdyń 100 paiyzyn kimge senip tapsyratynyńyzdy ózińiz sheshesiz. Qarajatty birneshe bólikke bólip, ártúrli basqarýshy kompaniialarǵa da berýge bolady", – dep jazdy Nartai Aralbaiuly.
Onyń sózinshe, jańa múmkindikti paidalaný mindetti emes. Azamattar zeinetaqy jinaqtaryn burynǵydai Ulttyq banktiń basqarýynda qaldyra alady. Al jeke investitsiialyq portfeldi basqarýshylardy tańdaǵan jaǵdaida qarajat joǵary tabys ákeletin quraldarǵa salynýy múmkin. Degenmen investitsiialyq kiristiń kólemi naryqtaǵy jaǵdaiǵa jáne tańdalǵan strategiiaǵa bailanysty bolady.
Nartai Aralbaiuly basqarýshy kompaniialardyń qyzmeti memleket pen qarjy naryǵyn retteýshi organdardyń baqylaýynda bolatynyn atap ótti. Eger kompaniianyń kiristiligi belgilengen eń tómengi kórsetkishten tómen tússe, aiyrmany óz kapitaly esebinen óteý tetigi qarastyrylǵan.
Sondai-aq zeinetaqy jinaǵyn jeke basqarýǵa berý úshin eń tómengi jetkiliktilik sheginen asý talap etilmeidi. Iaǵni azamattar qordaǵy qarajatyn merziminen buryn sheship almaidy, tek ony basqaratyn investitsiialyq uiymdy tańdaidy.
Nartai Aralbaiuly bul normany Ashat Aimaǵambetovpen birge usynǵanyn jetkizdi.
Aita keteiik, jańa tártip zeinetaqy jinaǵyn qolma-qol alýǵa nemese ony kúndelikti qajettilikke jumsaýǵa múmkindik bermeidi. Qarajat BJZQ júiesinde qalyp, salymshy tańdaǵan kompaniia arqyly investitsiialanady.
