Qazaqstanda 2026 jyldyń alǵashqy segiz aiynda zeinetaqy annýitetteri boiynsha saqtandyrý tólemderiniń kólemi 81,5 mlrd teńgeni qurady. Al saqtandyrý syilyqaqylarynyń kólemi 624,7 mlrd teńgege jetti, dep habarlaidy dalanews.kz.
Ministrliktiń málimetinshe, zeinetaqy annýiteti azamatqa jinaqtalǵan zeinetaqy qarajatyn ómirdi saqtandyrý kompaniiasyna aýdaryp, onyń ornyna turaqty tólemder alýǵa múmkindik beredi. Tólemder saqtandyrylǵan adamnyń ómir boiy jalǵasady. Tipti tólengen jalpy soma bastapqyda aýdarylǵan qarajattan asyp ketse de, saqtandyrý tólemderi toqtatylmaidy.
Zeinetaqy annýiteti shartyn jasaý úshin azamat belgilengen jasqa jetip, jetkilikti mólsherde zeinetaqy jinaǵyn ielenýi kerek. Qajetti qarajat kólemi adamnyń jasyna jáne bolashaq tólemderdiń sharttaryna qarai jeke esepteledi.
Vedomstvonyń túsindirýinshe, 2026 jyly dereý tólem bastalatyn zeinetaqy annýitetin 55 jasqa tolǵan erler men 53 jasqa tolǵan áielder rásimdei alady. Eger azamat úshin mindetti kásiptik zeinetaqy jarnalary jalpy alǵanda keminde 60 ai tólengen bolsa, jetkilikti jinaq bolǵan jaǵdaida annýitetti 50 jastan bastap rásimdeýge múmkindik bar.
Sonymen qatar keiinge qaldyrylǵan zeinetaqy annýiteti qarastyrylǵan. Mundai shartty 45 jastan bastap, al mindetti kásiptik zeinetaqy jarnalary keminde 60 ai tólengen jaǵdaida 40 jastan bastap jasaýǵa bolady. Bul rette saqtandyrý tólemderi zańnamada jáne shartta belgilengen jasqa jetkennen keiin bastalady.
Ministrlik málimetinshe, saqtandyrý tólemderi jyl saiyn ulǵaiady. Normativtik quqyqtyq aktide belgilengen indeksteý mólsherlemesi keminde 8%-dy quraidy. Naqty talaptar saqtandyrý shartynda kórsetiledi.
Sondai-aq shartta tólemderdiń kepildik berilgen kezeńi qarastyrylýy múmkin. Eger saqtandyrylǵan adam osy kezeń aiaqtalǵanǵa deiin qaitys bolsa, shart talaptaryna sáikes tólemder onyń muragerlerine beriledi. Bul mehanizm Biryńǵai jinaqtaýshy zeinetaqy qoryndaǵy jinaqtyń qaldyǵyn muraǵa qaldyrý tártibinen erekshelenedi.
Zeinetaqy annýitetin rásimdeý azamattyń eńbek qyzmetin jalǵastyrýyna kedergi keltirmeidi. Al memlekettik zeinetaqy alý quqyǵy zańnama talaptaryna sáikes bólek aiqyndalady.
Zeinetaqy annýitetin saqtandyrý qyzmetterin ministrlikke qarasty Memlekettik annýitettik kompaniia da usynady. Kompaniia azamattarǵa jinaqtarynyń jetkiliktiligi men bolashaq tólemderdiń mólsherine qatysty keńes beredi.
Shart jasamas buryn azamattarǵa saqtandyrý uiymdarynyń usynystaryn salystyrý, bastapqy tólem mólsherin, indeksteý tártibin, kepildik kezeńiniń sharttaryn jáne kelisimdi ózgertý múmkindikterin muqiiat zerdeleý usynylady. Aldyn ala esepti saqtandyrý kompaniiasynan alýǵa bolady. Budan bólek, BJZQ men saqtandyrý uiymynan boljamdy tólemderdi salystyrý úshin enpf.kz saityndaǵy boljamdy zeinetaqy kalkýliatoryn paidalanýǵa bolady.
