Almatyda úsh adamnyń ómirin qiǵan rezonansty jol apatyna bailanysty taǵy bir qylmystyq is boiynsha tergeý aiaqtaldy, dep habarlaidy dalanews.kz.
Bul joly kúdik Almaty politsiia departamentiniń qyzmetkerine qatysty bolyp otyr.
IIM málimetinshe, 2026 jylǵy 20 mamyrda Almaty PD qyzmetkerine qatysty sotqa deiingi tergeý aiaqtalǵan. Tergeý nusqasyna sáikes, onyń áreketsizdigi keiin adam ólimine ákelgen jol apatyna sebep bolǵan.
Vedomstvonyń habarlaýynsha, qyzmetkerge qatysty is Qylmystyq kodekstiń 370-baby 4-bóligi 1-tarmaǵy boiynsha qaralǵan.
«20 mamyrda Almaty qalasy politsiia departamentiniń qyzmetkerine qatysty sotqa deiingi tergeý aiaqtaldy. Qazirgi ýaqytta qylmystyq is materialdarymen tanysý júrgizilip jatyr», – dep habarlady IIM.
Áńgime Almatydaǵy rezonans týdyrǵan Zeekr kóligi qatysqan jol apaty týraly bolyp otyr.
Negizgi qylmystyq is QK 345-1-baby 4-bóligi – mas kúiinde kólik júrgizip, eki nemese odan da kóp adamnyń ólimine ákelgen jol qozǵalysy erejesin buzý faktisi boiynsha tergelgen.
13 mamyrda is Almatynyń mamandandyrylǵan aýdanaralyq qylmystyq sotyna joldanǵan.
Buǵan qosa, IIM ishki qaýipsizdik departamenti tyiym salynǵan seriiadaǵy memlekettik nómirlerdi zańsyz berý faktisi boiynsha da bólek tergeý júrgizip jatyr. Is QK 362-baby 1-bóligi boiynsha qaralýda.
Eske salsaq, Almatydaǵy atyshýly apattan úsh adam qaza tapqan. Oqiǵaǵa deiin kóshe jarysy bolǵany týraly aqparat taraǵan edi. Kei derekterde oǵan kásipkerdiń qatysy bolýy múmkin ekeni aitylǵan.
Is qoǵamda úlken rezonans týdyrdy.
Oqiǵadan keiin:
– 26 naýryzda politsiia túngi jarystarǵa qarsy baqylaýdy kúsheitetinin málimdedi;
– sol kúni Májilis depýtaty Murat Ábenov joǵary laýazymdy politseidiń iske qatysy bolýy múmkin ekenin aityp, video jariialady;
– keiin Almaty politsiiasynda qyzmettik tekserý bastaldy;
– IIM basshysy Erjan Sádenov birqatar basshylar qyzmetinen bosatylǵanyn habarlady.
Sondai-aq Almatyda jol qaýipsizdigi sharalary kúsheitilip, birneshe qylmystyq is qozǵaldy.
4 sáýirde Prezident Qasym-Jomart Toqaev ishki ister ministrine osy oqiǵaǵa bailanysty tapsyrma bergeni belgili boldy.
Al 22 mamyrda advokat Chernov aldyn ala sot otyrysy 28 mamyr kúni saǵat 15:00-de Almaty qalasynyń mamandandyrylǵan aýdanaralyq qylmystyq sotynda ótetinin habarlady.
