Onda 2017 jylǵy Dúniejúzi qazaqtar qaýymdastyǵy besinshi quryltaiynda Elbasy tapsyrǵan 7 tapsyrmanyń birazy oryndalyp jatqandyǵy týraly aityldy. Tikelei Prezident tapsyrmasymen «Otandastar» qory qurylyp, búginde óz jumysyn júrgizip jatyr.
«Áýeli ózderińiz biletindei «Máńgilik el» bolý úshin halyqtyń sanyn kóbeitý kerek. Sol sebepti de elden jyraqta júrgen 4-5 mln qazaqty otanǵa ákelý kerek.
Biz Reseidi, Mońǵoliiany, Qytai men Ózbekstandy aralap shyqtyq. Kelgisi kelip otyrǵan bir milliondai halyq bar. Biraq osy jerde taǵy bir másele bar. Ol – osyndaǵy halyqtyń ózinde baspana jetispei jatyr. Úi-kúii joq. Sondyqtan olarǵa áýeli baspana, sosyn jumys orynyn berýimiz kerek» – deidi Tóraǵanyń orynbasary.
Ol bul turǵyda Shymkenttiń shetindegi «Asar» aýylyn úlgi etti.
– Ony osydan 15 jyl buryn jasaǵanbyz. Osynyń jobasyn jańǵyrtý maqsatynda, Astanadan 10 shaqyrym (Qaraǵandy-Astana trassasynyń boiynda) 200 gektar jer alyp otyrmyz. Ony aldaǵy ýaqytta 500 gektarǵa ulǵaitý josparda bar. Ekinshi – Shymkent pen Tashkent arasynan 200 gektar jer aldyq. Onda da eldi-meken jasaýǵa áreket jasap jatyrmyz, – degen Zaýytbek Turysbekov bul jerlerge Qytaidan investitsiia tartatynyn aitty.
Ol úshin Qazaqstan men Qytai arasyndaǵy 51 ónerkásiptik jobasynyń qataryna qosylý maqsatynda jumys istelip jatqanyn aitty.
«Sol arqyly Qytaidan 5-6 zaýyt ákelip, solar arqyly eki eldi-mekenniń qurylysyn bastaimyz. Bul aldaǵy ýaqytta elimizdiń 9 oblysynda jalǵasyn tabatyn bolady» – deidi Zaýytbek Turysbekov.
Onyń aitýyna qaraǵanda, Qaýymdastyqtyń alǵa qoiǵan maqsattary tolyq oryndalǵan jaǵdaida aldaǵy 5 jyldyń ishinde elge kelgen qandastardyń barlyǵy jumyspen, baspanamen qamtamasyz etiletin bolady.
«Bizdiń sondai esebimiz bar. Bes jylda elge kelgen jalpy baýyrlarymyzdyń baspanasy men jumys ornyn sheshýimiz kerek. Bul – Elbasymyzdyń tapsyrmasy» – deidi Zaýytbek Turysbekov.
Onyń aitýyna qaraǵanda, shette júrgen qazaqtardyń eń basty máseleleriniń biri ult retinde tilden aiyrylyp bara jatqandyǵy.
– Qytaida boldyq. Barlyq jastar qytai tilinde sóileidi, aqparatty sol tilde alady. Reseidegi jaǵdai da týra sondai. Barlyǵy oryssha oqyp jatyr. Sondyqtan biz qazir baǵdarlama jasap jatyrmyz. Onda sol balalarǵa qazaq tilin qalai meńgertý kerek, ádet-ǵurpymyzdy, salt-dástúrimizdi qalai úiretemiz degen máseleler qaralǵan. Sol úshin biz qysqa da nusqa 8-9 beinerolik jasadyq. Sebebi qazirgi jastar uzaq, bir saǵatttyq, eki saǵattyq kinony kórmeidi. Biz sony eskere otyryp ulttyq rýhymyzǵa, tanym-túsinigimizge qatysty dúnielerdi 5 minýtqa sidyrýǵa tyrystyq, – deidi ol.
Aldaǵy ýaqytta bul rolikterdi kinoteatrlarmen kelise otyryp, kino bastalardyń aldynda úlken ekrannan kórsetýdi qolǵa almaqshy.
