Reseige jumys isteý maqsatymen barǵan shetel azamattarynyń arasynda Qazaqstan azamattary tórtinshi orynǵa jaiǵasty. 2026 jyldyń alǵashqy jartyjyldyǵynda Resei shekarasynan ótip, sapar maqsaty retinde jumysty kórsetken qazaqstandyqtardyń sany 122 myńnan asty. Bul týraly TASS agenttigi tanysqan materialdarda aitylǵan, dep habarlaidy dalanews.kz.
Derekterge sáikes, 2026 jyldyń alǵashqy alty aiynda Reseige jumys isteý maqsatymen 122 654 Qazaqstan azamaty barǵan. Osy kórsetkish boiynsha Qazaqstan Ózbekstan, Tájikstan jáne Qyrǵyzstannan keiingi tórtinshi orynǵa jaiǵasqan.
Reseige jumys isteýge barǵandar sany boiynsha Ózbekstan azamattary kósh bastap tur. Jarty jylda bul elden 1 178 609 adam Reseige kirgen. Ekinshi orynda – Tájikstan azamattary (494 518 adam), úshinshi orynda – Qyrǵyzstan azamattary (289 061 adam).
Al Qytai azamattary 89 656 adammen besinshi orynǵa jaiǵasqan. Sondai-aq Reseige jumys isteý maqsatymen Armeniiadan 88 629, Ázerbaijannan 62 440, Úndistannan 27 419, Túrikmenstannan 13 428 jáne Túrkiiadan 8 360 adam barǵan.
Qazaqstan azamattaryna Reseide jumys isteý úshin patent qajet emes
Reseide shetel azamattaryn jumysqa ornalastyrý tártibi olardyń azamattyǵyna bailanysty ózgeredi. Máselen, Ózbekstan, Tájikstan jáne Ázerbaijan azamattary Reseide jumys isteý úshin tiisti eńbek patentin alýy kerek. Al Qazaqstan, Qyrǵyzstan jáne Armeniia azamattaryna mundai patent talap etilmeidi.
Qytai, Úndistan, Túrikmenstan jáne Túrkiia azamattary Reseide jumys isteý úshin jumys vizasyn alyp, eńbek etýge ruqsat rásimdeýi qajet.
Qazaqstan azamattaryna patenttiń qajet bolmaýy eki eldiń Eýraziialyq ekonomikalyq odaqqa (EAEO) múshe bolýymen bailanysty. Odaq aiasynda Qazaqstan azamattary Reseide jumys isteý úshin jeke jumysqa ruqsat nemese patent alýǵa mindetti emes.
