Áleýmettik jelilerde Óskemende bolǵan jol apatynyń beinejazbasy tarady. Kadrlarda jeńil kóliktiń jol jiegimen kele jatqan jas velosipedshiler tobyna soǵylǵan sáti anyq kórinedi, dep habarlaidy dalanews.kz.
Aldyn ala málimet boiynsha, oqiǵa 27 mamyr kúni tańerteń Ertis ózeni arqyly ótetin ortalyq kópirde bolǵan. “Toyota Avensis” kóliginiń júrgizýshisi manevr jasaý kezinde qaýipsizdik talaptaryn saqtamai, jol jiegimen qozǵalyp kele jatqan velosipedshilerdi qaǵyp ketken.
Soqqy saldarynan balalar jan-jaqqa shashyrap qulaǵan. Beinejazbada bir jasóspirimniń apattan soń velosipedin jyldamdatyp, kóliktiń aldyna túsip ketkeni baiqalady.
Jol-kólik oqiǵasy saldarynan 6 kámeletke tolmaǵan jasóspirim túrli dene jaraqattarymen meditsinalyq mekemege jetkizildi.
Qazirgi ýaqytta atalǵan derek boiynsha sotqa deiingi tergeý bastalyp, qajetti saraptamalar taǵaiyndalǵan. Oqiǵanyń barlyq mán-jaiy anyqtalyp jatyr.
