Elordanyń Esil aýdanynda zańsyz salynǵan 32 dúńgirshek buzyldy, - dep habarlaidy Dalanews.kz elorda ákimdiginiń resmi saityna silteme jasap.
Zańsyz qoiylǵan saýda nysandary tek jer zańnamasyn buzý ǵana emes, sonymen qatar aýdan turǵyndary úshin de birqatar qolaisyzdyqtar týdyrady. Máselen, qoǵamdyq keńistikterdiń birinde ornalasqan kókónis dúńgirshegi jaiaý júrginshilerdiń qozǵalysyna kedergi keltirip, turǵyndar úshin qolaisyz jaǵdai týdyrǵan bolatyn. Buǵan qosa, mundai nysandar qalanyń sáýlettik kelbetine keri áserin tigizedi, sanitarlyq talaptarǵa sáikes kele bermeidi jáne keibir jaǵdailarda qaýipsizdik normalaryn óreskel buza otyryp ornatylady.
2024 jyly ákimdik mamandary turǵyndar shaǵymymen monitoring júrgizý barysynda memleket menshigindegi jer telimderin zańsyz iemdengen 32 nysandy anyqtady. Jyl sońyna deiin olardyń barlyǵy da alynyp tastaldy.
Degenmen, bul máseleniń tolyq sheshimin tapqanyn bildirmeidi:
«Esil aýdany ákimdigi retsiz qurylysqa jol bermeý jáne kásipkerlerge zań aiasynda jumys isteý úshin qolaily jaǵdai jasaý maqsatynda júieli jumys júrgizip keledi. Basty mindetimiz – jer qatynastaryn retke keltirip, qalanyń qolaily ári zamanaýi kelbetin qalyptastyrý. Dese de, keibir kásipkerler bilmestikpen zańǵa qaishy áreketter jasaidy. Olarǵa aiyppul salynyp, zańdastyrý boiynsha túsindirme jumystary júrgiziledi», – dep atap ótti aýdan ákiminiń keńesshisi Quralai Sliambekova.
Esil aýdanynyń ákimdigi ýákiletti organdarmen birlesip, aýmaqty turaqty túrde tekserip, zańsyz nysandardy anyqtaidy. Sol ýaqytta menshik ielerine nysandardy óz erkimen alyp tastaý týraly nusqama beriledi, al talap oryndalmaǵan jaǵdaida tiep alyp ketedi.
Eske sala keteiik, memlekettik jer telimderin zańsyz ielený – ákimshilik quqyqbuzýshylyqqa jatady. Ákimshilik quqyqbuzýshylyq týraly kodekstiń 136-babyna sáikes, zańbuzýshylyq úshin:
- jeke tulǵalarǵa – 75 AEK;
- shaǵyn kásipkerlik sýbektilerine – 100 AEK;
- iri kásiporyndarǵa – 700 AEK mólsherinde aiyppul salynady.
Saýda nysanyn ornatýdy josparlap otyrǵan kásipkerler aldymen tiisti ruqsat qujattaryn alýy qajet. Ol úshin «SPK Astana» AQ-ǵa júginýge bolady.
Aýdan ákimshiligi zańsyz qurylystardyń aldyn alý, shaǵyn jáne orta bizneske zań sheńberinde jumys isteý úshin jaǵdai jasaý baǵytynda óz jumysyn jalǵastyra beredi.
