Jánibek Álimhanuly Hamza Shirazben jekpe-jekke qatysty naqty maqsatyn aityp, britandyq boksshynyń ózi emes, onyń WBO chempiondyq belbeýi qyzyqtyratynyn málimdedi, dep habarlaidy dalanews.kz.
«Ol meni qyzyqtyrmaidy! Ol – tanymal emes boksshy! Ol maǵan eshteńe bermeidi. Maǵan tek titýl kerek. Sodan keiin WBC men WBO belbeýleri úshin jekpe-jek! Bul Jánibek pen Kanelonyń aiqasy bolady», – dedi Álimhanuly.
Qazir Jánibek Álimhanulynyń kásibi rekordy 17 jeńis, onyń 12-si nokaýtpen, jeńilissiz. Ol biyl orta salmaqtan ekinshi orta salmaqqa kóterilip, WBO nusqasy boiynsha osy diviziondaǵy chempiondyq belbeýge mindetti úmitker atandy.
WBO Hamza Shirazǵa chempiondyq titýlyn Álimhanulymen jekpe-jekte qorǵaýdy mindettedi. Uiym eki tarapqa kelissóz júrgizý úshin 20 kún ýaqyt berdi, merzim 3 qyrkúiekte aiaqtalady. Eger kelisimge qol jetkizilmese, jekpe-jek promoýterlik saýdaǵa shyǵarylýy múmkin.
Alaida britandyq boksshy bul jekpe-jekke qarsy. Shiraz WBO sheshimin qatty synap, Álimhanulynyń doping synamasyna bailanysty buryn diskvalifikatsiialanǵanyn alǵa tartty. Britandyq sportshy tipti titýldan bas tartyp, belbeýdi bos qaldyrý nusqasyn qarastyryp otyrǵanyn málimdedi.
Shirazdyń aitýynsha, WBO sheshimi sporttyń adaldyǵyna qaishy. Ol uiymnyń Álimhanulyna mindetti úmitker mártebesin berýin «boks úshin masqara» dep baǵalaǵan.
Jánibek tarapy bolsa, britandyq boksshynyń áreketin jekpe-jekke shyǵýǵa qulyqsyzdyqpen bailanystyrady. Qazaqstandyq boksshynyń menedjeri Berik Sultan Álimhanulynyń WBO sheshimine sáikes zańdy túrde mindetti úmitker ekenin aityp, Shirazdyń komandasy jekpe-jekten qashýǵa tyrysyp otyr degen pikir bildirgen.
Buǵan deiin Álimhanuly jekpe-jekti Niý-Iorkte ótkizgisi keletinin de aitqan. Onyń pikirinshe, qalada qazaq jankúierleri kóp bolǵandyqtan, arena tolyǵymen onyń jankúierlerine tolýy múmkin.
Eger Shiraz belbeýden bas tartsa, Jánibekke basqa qarsylas taǵaiyndalýy múmkin. Qazir WBO reitinginde joǵary turǵan Diego Pacheko, Djeikob Benk jáne Kevin Lele Sadjo siiaqty boksshylar yqtimal kandidattar retinde qarastyrylyp jatyr.
Al Álimhanulynyń jospary ózgermegen: aldymen WBO belbeýin ielený, sodan keiin WBC titýly úshin Saýl «Kanelo» Alvarespen úlken jekpe-jek ótkizý. Onyń qazirgi málimdemesine qaraǵanda, Shiraz bul joldaǵy basty maqsat emes, chempiondyq belbeýge aparatyn qarsylas qana.
