Qazaqstandy ǵana emes, shetelderdi de eleń etkizgen Bishimbaev isine qatysty sot úkimi shyqty. Áielin óltirdi degen aýyr aiyp taǵylǵan eks-ministr Qýandyq Bishimbaevqa 24 jylǵa bas bostandyǵynan aiyrý jazasy taǵaiyndaldy. Dalanews.kz osy iske qatysty zańger pikirin surady.
Zańger Tileýjan Kishkenebaevtyń sózinshe, Bishimbaevqa sot ádil úkim shyǵardy. Bul qylmystyq iske qatysy bar mán-jaidy, derekter men dálelderdi taldap baryp shyǵarylǵan úkim boldy.
"Bishimbaevqa qatysty úkim zańdy negizde shyǵaryldy. Sebebi taǵylǵan aiyptyń ózi asa aýyr aiyptardyń sanatyna jatady jáne kinási dálelin tapqandyqtan, oǵan sot osyndai úkim shyǵaryp otyr. Iaǵni eki birdei baptyń jiyntyǵy boiynsha 24 jyl berildi", - dep túsindirdi maman.
Sarapshynyń sózine súiensek, Bishimbaev merziminen buryn bosap shyǵý týraly ótinishti berýi úshin de biraz ýaqyt ótýi kerek.
"Jazanyń úshten bir bóligin ótegennen keiin ótinish berýge bolady degen ereje bar. Túrme ornalasqan jerdiń jergilikti sottaryna túrme basshysy usynys beretin bolsa, sot shartty túrde merziminen buryn bosatý máselesin qarastyrady. Eger de sottalýshynyń múmkindigi bolmasa, sot ony ýaqytynan erte shyǵarýdan bas tartýy múmkin. Bul jaǵdaida jábirlenýshiniń keshirimi kerek bolady. Jábirelenýshi tarap keshirim bermese, shartty túrde merziminen buryn bosatpaýy múmkin", - dedi ol.
Buǵan deiin Joǵarǵy sot ókilderi Qýandyq Bishimbaev merziminen buryn bosap shyǵý týraly ótinishti qashan bere alatynyn aitqan edi.
"Asa aýyr qylmysy úshin sottalǵan Bishimbaev mundai ótinishhat berýge jazasynyń 2/3 bóliginen keiin, iaǵni bul 2039-2040 jyldary bere alady", - dedi Joǵarǵy sottyń BAQ-pen ózara is-qimyl jónindegi úilestirýshisi Alma Esimova.
Sot úkimimen eks-ministr jazasyn qaýipsizdigi eń joǵary túzeý mekemesinde óteitin boldy.
"Bul óte aýyr qylmystyrdyń sanatyna jatatyn bolǵandyqtan jazany óteitin jeri de qaýipsizdigi eń joǵary túzeý mekemesinde bolýy kerek. Bul máselede de sot óziniń baǵasyn durys bergen", - dep túsindirdi bul týrasynda zańger.
Alaida Bishimbaev appeliatsiialyq shaǵym berýi múmkin eken.
"Úkim zańdy kúshine engen joq. Aldaǵy ýaqytta Bishimbaevtyń advokattary apelliatsiialyq shaǵym berýi múmkin. Shaǵym berilgen kezde ony apelliatsiialyq sot alqasy qaraidy. Ol jerde úsh sýdia bolady. Olar sottyń shyǵarǵan sheshimi zańdy nemese zańsyz bolǵanyn qaraidy. Durys bolmasa, appelliatsiialyq sot alqasy úkimdi ózgertýi múmkin. Úkim zańdy negizde shyǵarylǵan, ony ózgertýge eshqandai negiz joq dep tapsa, úkimdi sol kúiinde ózgerissiz qaldyrady", - dep túiindedi ol.
Eske salaiyq, byltyr Qýandyq Bishimbaev áieli Saltanat Núkenovany óltirdi degen kúdikpen qamaýǵa alynǵan edi. Oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- azaptaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
