Májilis depýtaty Erbolat Saýryqov qoǵamdaǵy ótkir máseleni kóterdi, dep habarlaidy Dalanews.kz.
"Keiingi ýaqytta elimizdiń túrli óńirinde mektep oqýshylarynyń mektep aýmaǵynan, sabaqtan tys ýaqytta, demalys, kanikýl kezinde jasaǵan quqyqbuzýshylyqtary úshin mektep direktorlary men oqý bóliminiń meńgerýshilerin tártiptik jazaǵa tartý nemese jumystan shyǵarý kóbeiip barady. Bul óte alańdatarlyq úrdis dep sanaimyz. Óitkeni mektep basshylyǵy tek oqý-tárbie protsesin uiymdastyrýǵa jaýapty ekenin bárimiz jaqsy bilemiz. Al sabaqtan tys ýaqytta nemese demalys kezinde bolǵan oqiǵalar úshin olardy jazalaý ádiletsizdik", - deidi ol.
Depýtattyń aitýynsha, másele aýyldyq eldi mekenderde qatty ýshyǵyp tur.
"Búginde aýyl mektepterinde direktor jáne oqý bóliminiń meńgerýshisi laýazymdaryna úmitker tabý qiyn. "Erteń men de jumystan shyǵyp qalamyn ba? Negizsiz jaýapkershilikke tartylamyn ba?" degen qorqynysh muǵalimder men basshylardyń arasynda kúndelikti qalypty jaǵdaiǵa ainaldy. Bizdiń kóterip otyrǵan máselemiz tek kadr máselesi emes, bul - aýyl mektebiniń taǵdyry týraly másele. Eger aýyl mektebinde bilikti basshy bolmasa - aýyl balalarynyń bolashaǵyna da qaýip tónedi degen sóz", - deidi ol.
Erbolat Saýryqov bul jaǵdaida zańnamalyq turǵydan retteý qajet ekenin jetkizdi.
"Mektep direktorlary men meńgerýshilerdi mektepten tys ýaqytta, demalys nemese kanikýl kezindegi oqiǵalar úshin jumystan bosatý zańǵa da, logikaǵa da qaishy keledi. Bizdiń oiymyzsha, bul máseleni sheshýde halyqaralyq tájiribege de nazar aýdarý qajet. Barlyq damyǵan elde mektep basshylary tek oqý protsesi men resmi mektep is-sharalary aiasynda jaýap beredi. Basqa jaǵdailarda ata-analar tolyq jaýapty. Bul – ádiletti jáne tiimdi tásil", - dep túiindedi depýtat.
