ءماجىلىس دەپۋتاتى ەربولات ساۋرىقوۆ قوعامداعى وتكىر ماسەلەنى كوتەردى، دەپ حابارلايدى Dalanews.kz.
"كەيىنگى ۋاقىتتا ەلىمىزدىڭ ءتۇرلى وڭىرىندە مەكتەپ وقۋشىلارىنىڭ مەكتەپ اۋماعىنان، ساباقتان تىس ۋاقىتتا، دەمالىس، كانيكۋل كەزىندە جاساعان قۇقىقبۇزۋشىلىقتارى ءۇشىن مەكتەپ ديرەكتورلارى مەن وقۋ ءبولىمىنىڭ مەڭگەرۋشىلەرىن تارتىپتىك جازاعا تارتۋ نەمەسە جۇمىستان شىعارۋ كوبەيىپ بارادى. بۇل وتە الاڭداتارلىق ءۇردىس دەپ سانايمىز. ويتكەنى مەكتەپ باسشىلىعى تەك وقۋ-تاربيە پروسەسىن ۇيىمداستىرۋعا جاۋاپتى ەكەنىن ءبارىمىز جاقسى بىلەمىز. ال ساباقتان تىس ۋاقىتتا نەمەسە دەمالىس كەزىندە بولعان وقيعالار ءۇشىن ولاردى جازالاۋ ادىلەتسىزدىك"، - دەيدى ول.
دەپۋتاتتىڭ ايتۋىنشا، ماسەلە اۋىلدىق ەلدى مەكەندەردە قاتتى ۋشىعىپ تۇر.
"بۇگىندە اۋىل مەكتەپتەرىندە ديرەكتور جانە وقۋ ءبولىمىنىڭ مەڭگەرۋشىسى لاۋازىمدارىنا ۇمىتكەر تابۋ قيىن. "ەرتەڭ مەن دە جۇمىستان شىعىپ قالامىن با؟ نەگىزسىز جاۋاپكەرشىلىككە تارتىلامىن با؟" دەگەن قورقىنىش مۇعالىمدەر مەن باسشىلاردىڭ اراسىندا كۇندەلىكتى قالىپتى جاعدايعا اينالدى. ءبىزدىڭ كوتەرىپ وتىرعان ماسەلەمىز تەك كادر ماسەلەسى ەمەس، بۇل - اۋىل مەكتەبىنىڭ تاعدىرى تۋرالى ماسەلە. ەگەر اۋىل مەكتەبىندە بىلىكتى باسشى بولماسا - اۋىل بالالارىنىڭ بولاشاعىنا دا ءقاۋىپ تونەدى دەگەن ءسوز"، - دەيدى ول.
ەربولات ساۋرىقوۆ بۇل جاعدايدا زاڭنامالىق تۇرعىدان رەتتەۋ قاجەت ەكەنىن جەتكىزدى.
"مەكتەپ ديرەكتورلارى مەن مەڭگەرۋشىلەردى مەكتەپتەن تىس ۋاقىتتا، دەمالىس نەمەسە كانيكۋل كەزىندەگى وقيعالار ءۇشىن جۇمىستان بوساتۋ زاڭعا دا، لوگيكاعا دا قايشى كەلەدى. ءبىزدىڭ ويىمىزشا، بۇل ماسەلەنى شەشۋدە حالىقارالىق تاجىريبەگە دە نازار اۋدارۋ قاجەت. بارلىق دامىعان ەلدە مەكتەپ باسشىلارى تەك وقۋ پروسەسى مەن رەسمي مەكتەپ ءىس-شارالارى اياسىندا جاۋاپ بەرەدى. باسقا جاعدايلاردا اتا-انالار تولىق جاۋاپتى. بۇل – ادىلەتتى جانە ءتيىمدى ءتاسىل"، - دەپ تۇيىندەدى دەپۋتات.
