Jańaózenniń týmasy, búginde AQSh-tyń Tehas shtatynda turatyn Anýarbek Imanbaev sheteldegi ómiri, qazaqy bolmysyn saqtaýy, Tesla kompaniiasymen bailanysy jáne Ilon Maskpen tanystyǵy týraly “Tsýkerbergtiń kórshileri” YouTube arnasyna bergen suhbatynda málimdedi, dep habarlaidy dalanews.kz.
AQSh-qa qonys aýdarýy
Anýarbek Imanbaevtyń aitýynsha, onyń otbasy 1992 jyly AQSh-qa kóshken. Bul múmkindik ákesiniń amerikalyq munai kompaniiasynda taǵylymdamadan ótýine bailanysty týǵan. Ol kezde Anýarbek nebári toǵyz jasta bolǵan.
Bastapqyda otbasy aǵylshyn tilin meńgerip, keiin Qazaqstanǵa qaita oralýdy josparlaǵan. Alaida ýaqyt óte kele AQSh-ta turaqtap qalǵan.
Imanbaev keiin ákesiniń jolyn qýyp, munai-gaz salasynda eńbek etken. Ol AQSh-taǵy iri jeke kompaniialarda jumys istep, munai óndirisindegi IT tehnologiialaryn engizý jobalaryna qatysqan.
Qazaq tilin qalai saqtap qaldy?
Amerikada 34 jyl tursa da, Anýarbek qazaq tilin umytpaǵanyn aitady. Onyń sózinshe, buǵan eń aldymen ata-anasynyń ustanymy áser etken.
“Kópshilik AQSh-qa kóshken soń jergilikti ortaǵa beiimdelý úshin atyn ózgertedi. Bizde olai bolǵan joq. Ákem bizdi eń aldymen patriot etip tárbieledi. Biz árdaiym qazaq ekenimizdi maqtan tuttyq”, – deidi ol.
Sonymen qatar ol Qazaqstanǵa alǵash kelgen jyldary keibir adamdardyń ózin oryssha sóilemegeni úshin túsinbei, tipti bilimsiz adamdai qabyldaǵanyn aitty.
“Adamdar meni oryssha sóilemegenim úshin bilimsiz adamdai kóretin. Biraq men úshin qazaq tilin joǵaltpaý bárinen mańyzdy boldy”, – dedi Imanbaev.
Onyń pikirinshe, qai elde ómir súrse de, adam óziniń ulttyq bolmysyn saqtap qalýy tiis.
“Qazaqstandyqtarǵa aitar keńesim – týǵan jerlerińizdi maqtan tutyńyzdar. Amerikalyq bolýǵa tyrysýdyń qajeti joq. Qazaq bolyp qalý – eń úlken qundylyq”, – dedi ol.
Tesla-daǵy joly
Anýarbek Imanbaevtyń aitýynsha, onyń ómirindegi betburys 2012 jyly bolǵan. Sol kezde áriptesteriniń biri Tesla kompaniiasyna jumysqa aýysyp, ony Ilon Mask negizin qalaǵan kompaniiamen tanystyrǵan.
Frimonttaǵy Tesla zaýytyna barǵannan keiin kompaniianyń bolashaǵyna senimi artyp, elge oralǵan soń barlyq derlik jinaǵyn Tesla aktsiialaryna investitsiialaǵan.
“Ol kezde búgingi biz biletin Tesla joq edi. Kópshilik bul kompaniiaǵa kúmánmen qaraityn. Biraq zaýytty kórgennen keiin kompaniianyń bolashaǵyna qatty sendim. Úige barǵan soń bar jinaǵymdy Tesla aktsiialaryn satyp alýǵa jumsadym”, – dedi ol.
Keiin Imanbaev Tesla qaýymdastyǵynyń belsendi múshesine ainalyp, Hiýstonda Tesla ieleriniń klýbyn qurǵan. Sondai-aq Tesla Geeks atty YouTube arnasyn ashyp, Tesla men SpaceX taqyrybynda podkast júrgize bastaǵan.
Imanbaevtyń sózinshe, Tesla-nyń referaldyq baǵdarlamasy arqyly 200-den astam elektromobildiń satylýyna yqpal etken.
“Men Tesla-ny adamdarǵa jai ǵana jarnamalaǵan joqpyn. Kompaniianyń ideiasyna shyn sendim. Sonyń nátijesinde 200-den astam kóliktiń satylýyna úles qostym”, – dedi ol.
Osynyń nátijesinde 2018 jyldyń qorytyndysynda Soltústik Amerikadaǵy Tesla-nyń úzdik referaly atanyp, syilyq retinde quny shamamen 170 myń dollar turatyn Tesla Model S alǵan. Keiin taǵy eki Tesla Roadster elektromobilin utyp alǵan.
Ilon Maskpen kezdesýi
Anýarbek Imanbaev Ilon Maskpen birneshe ret kezdeskenin aityp, este qalǵan sátterdiń biri Tesla Model Y tanystyrylymynda bolǵanyn eske aldy.
“Ilon Mask sahnaǵa shyqqanda kópshilik túrli elderdiń atyn aityp jatty. Men “Kazakhstan!” dep qatty daýystadym. Ol maǵan qarap, keiin “We are going to Kazakhstan” dedi. Sol sát men úshin erekshe áserli boldy”, – dedi ol.
Onyń aitýynsha, osy kezdesýlerden keiin Tesla basshylyǵymen Qazaqstandaǵy elektromobil infraqurylymyn damytý máseleleri de talqylanǵan.
Imanbaevtyń sózinshe, kompaniia basshylyǵymen júrgizilgen kelissózderdiń nátijesinde Astana men Almatyda alǵashqy Tesla Supercharger qýattaý stantsiialary ornatylǵan.
