Almatyda quqyq qorǵaý organdary kiberqylmysqa qarsy kúresti kúsheitip keledi. Sońǵy ýaqytta internet alaiaqtarynyń áreketi tek smartfon emes, qarapaiym statsionarlyq telefon arqyly da júzege asa bastaǵan. Ekonomikalyq tergep-tekserý departamentiniń málimeti boiynsha, 2024 jyldyń alǵashqy alty aiynda megapoliste 12 qylmystyq is tirkelip, keltirilgen shyǵyn 3 milliard teńgege jetken. Bul – burynǵy jyldarmen salystyrǵanda birneshe ese joǵary kórsetkish.
Osyǵan bailanysty Almatyda arnaiy mobildik toptar qurylyp, turǵyndarmen betpe-bet kezdesý formatynda túsindirý sharalary qolǵa alynǵan. Mundai kezekti shara Áýezov aýdanynda ótti. «Zań men tártip» tujyrymdamasy aiasynda uiymdastyrylǵan jiyn barysynda 40-tan astam qala turǵyny quzyrly organ ókilderine óz suraqtaryn qoiyp, naqty jaýap alýǵa múmkindik aldy.
Ekonomikalyq tergep-tekserý departamentiniń ókili Jaqsylyq Myrzahannyń aitýynsha, alaiaqtar qazir úi telefondaryna da qońyraý shalyp, ártúrli syltaýmen azamattardyń jeke málimetterin alýǵa tyrysady. Bireýlerge «bank shotyńyz buǵattaldy» dese, endi bireýlerge «jeke kýáligińiz jaramsyz» degen siiaqty jalǵan aqparat berip, aqsha aýdarýǵa itermeleitin bolǵan. Bul tásil ásirese egde jastaǵy adamdar úshin úlken qaýip týdyryp otyr.
Áýezov aýdany prokýratýrasynyń prokýrory Islam Tasbolatulynyń aitýynsha, aýdan aýmaǵynda qurylǵan mobildik top quramynda prokýratýramen qatar politsiia basqarmasy, ákimdik, qarjylyq monitoring jáne sybailas jemqorlyqqa qarsy qyzmet mamandary birlesip jumys isteýde. Mundaǵy basty maqsat – turǵyndarmen ashyq dialog ornatyp, quqyqtyq saýattylyqty arttyrý.
Osyndai is-sharalar kezinde turǵyndar jeke quqyqtyq máselelerine bailanysty da keńes alyp jatady. Mysaly, qala turǵyny Aiaýjan Altaihanova politsiia basqarmasynan tiisti quqyqtyq keńes alyp, naqty aqparat alǵanyn aitty.
Qoǵamdyq tártip pen azamattardyń qaýipsizdigi tek jazalaý arqyly emes, aldyn alý men túsindirý jumystaryn úilestire júrgizý arqyly qamtamasyz etiletini anyq. Sondyqtan quqyq qorǵaý organdary kiberalaiaqtyqpen kúreste quqyqtyq mádenietti qalyptastyrýǵa basa nazar aýdaryp otyr.
