الماتىدا قۇقىق قورعاۋ ورگاندارى كيبەرقىلمىسقا قارسى كۇرەستى كۇشەيتىپ كەلەدى. سوڭعى ۋاقىتتا ينتەرنەت الاياقتارىنىڭ ارەكەتى تەك سمارتفون ەمەس، قاراپايىم ستاسيونارلىق تەلەفون ارقىلى دا جۇزەگە اسا باستاعان. ەكونوميكالىق تەرگەپ-تەكسەرۋ دەپارتامەنتىنىڭ مالىمەتى بويىنشا، 2024 جىلدىڭ العاشقى التى ايىندا مەگاپوليستە 12 قىلمىستىق ءىس تىركەلىپ، كەلتىرىلگەن شىعىن 3 ميلليارد تەڭگەگە جەتكەن. بۇل – بۇرىنعى جىلدارمەن سالىستىرعاندا بىرنەشە ەسە جوعارى كورسەتكىش.
وسىعان بايلانىستى الماتىدا ارنايى موبيلدىك توپتار قۇرىلىپ، تۇرعىندارمەن بەتپە-بەت كەزدەسۋ فورماتىندا ءتۇسىندىرۋ شارالارى قولعا الىنعان. مۇنداي كەزەكتى شارا اۋەزوۆ اۋدانىندا ءوتتى. «زاڭ مەن ءتارتىپ» تۇجىرىمداماسى اياسىندا ۇيىمداستىرىلعان جيىن بارىسىندا 40-تان استام قالا تۇرعىنى قۇزىرلى ورگان وكىلدەرىنە ءوز سۇراقتارىن قويىپ، ناقتى جاۋاپ الۋعا مۇمكىندىك الدى.
ەكونوميكالىق تەرگەپ-تەكسەرۋ دەپارتامەنتىنىڭ وكىلى جاقسىلىق مىرزاحاننىڭ ايتۋىنشا، الاياقتار ءقازىر ءۇي تەلەفوندارىنا دا قوڭىراۋ شالىپ، ءارتۇرلى سىلتاۋمەن ازاماتتاردىڭ جەكە مالىمەتتەرىن الۋعا تىرىسادى. بىرەۋلەرگە «بانك شوتىڭىز بۇعاتتالدى» دەسە، ەندى بىرەۋلەرگە «جەكە كۋالىگىڭىز جارامسىز» دەگەن سياقتى جالعان اقپارات بەرىپ، اقشا اۋدارۋعا يتەرمەلەيتىن بولعان. بۇل ءتاسىل اسىرەسە ەگدە جاستاعى ادامدار ءۇشىن ۇلكەن ءقاۋىپ تۋدىرىپ وتىر.
اۋەزوۆ اۋدانى پروكۋراتۋراسىنىڭ پروكۋرورى يسلام تاسبولات ۇلىنىڭ ايتۋىنشا، اۋدان اۋماعىندا قۇرىلعان موبيلدىك توپ قۇرامىندا پروكۋراتۋرامەن قاتار پوليسيا باسقارماسى، اكىمدىك، قارجىلىق مونيتورينگ جانە سىبايلاس جەمقورلىققا قارسى قىزمەت ماماندارى بىرلەسىپ جۇمىس ىستەۋدە. مۇنداعى باستى ماقسات – تۇرعىندارمەن اشىق ديالوگ ورناتىپ، قۇقىقتىق ساۋاتتىلىقتى ارتتىرۋ.
وسىنداي ءىس-شارالار كەزىندە تۇرعىندار جەكە قۇقىقتىق ماسەلەلەرىنە بايلانىستى دا كەڭەس الىپ جاتادى. مىسالى، قالا تۇرعىنى اياۋجان التايحانوۆا پوليسيا باسقارماسىنان ءتيىستى قۇقىقتىق كەڭەس الىپ، ناقتى اقپارات العانىن ايتتى.
قوعامدىق ءتارتىپ پەن ازاماتتاردىڭ قاۋىپسىزدىگى تەك جازالاۋ ارقىلى ەمەس، الدىن الۋ مەن ءتۇسىندىرۋ جۇمىستارىن ۇيلەستىرە جۇرگىزۋ ارقىلى قامتاماسىز ەتىلەتىنى انىق. سوندىقتان قۇقىق قورعاۋ ورگاندارى كيبەرالاياقتىقپەن كۇرەستە قۇقىقتىق مادەنيەتتى قالىپتاستىرۋعا باسا نازار اۋدارىپ وتىر.
