Jambyl oblysynyń Turar Rysqulov aýdanyndaǵy Lýgovaia stantsiiasynda 25 jastaǵy sportshy Ahmet Dúkenbai oqqa ushty, dep habarlaidy dalanews.kz.
Oqiǵa 1 tamyzǵa qaraǵan túni bolǵan. Marqumnyń týystarynyń aitýynsha, Ahmet Dúkenbai óz úiiniń mańynda birneshe ret oq atylyp, aýyr jaralanǵan. Ol aýrýhanaǵa jetkizilgenimen, alǵan jaraqattarynan kóz jumǵan.
Marqumnyń ápkesi Zarina Dúkenbaevanyń sózinshe, otbasy bul qylmystyń artynda uiymdasqan qylmystyq top turýy múmkin dep sanaidy. Onyń aitýynsha, Ahmetke buǵan deiin belgili bir adamdardyń yqpalyna qosylý usynylǵan, alaida ol odan bas tartqan.
Jesiri Altynai Boranbaidyń aitýynsha, qaiǵyly oqiǵaǵa deiin Ahmet ózine qaýip tónip turǵanyn aityp, otbasyna saq bolýdy eskertken.
Marqumnyń ákesi Serik Dúkenbaiuly otbasynyń qaýipsizdigine alańdaitynyn aityp, memlekettik qorǵaý berýdi talap etti.
Jambyl oblysy politsiia departamenti adam óltirý faktisi boiynsha sotqa deiingi tergeý bastalǵanyn málimdedi. Vedomstvonyń habarlaýynsha, kúdikti anyqtalyp, ýaqytsha ustaý izoliatoryna qamalǵan.
Politsiia qazirgi ýaqytta qylmystyń barlyq mán-jaiyn anyqtaýǵa baǵyttalǵan tergeý amaldary júrgizilip jatqanyn, al Qylmystyq-protsestik kodekstiń 201-babyna sáikes ózge aqparat jariialanbaitynyn habarlady.
