Jambyl oblysy politsiia departamenti bastyǵynyń burynǵy orynbasary Jaidarbek Quttybaev pen Talas aýdandyq politsiia bóliminiń eks-basshysy Erken Abaev qylmystyq quqyqbuzýshylyq jasaǵany úshin kináli dep tanylyp, bas bostandyǵynan aiyryldy, dep habarlaidy dalanews.kz.
Sot qandai sheshim shyǵardy
Orda.kz málimetinshe, is boiynsha burynǵy politsiia qyzmetkeri Darhan Ýáliev jábirlenýshi retinde tanylǵan. Memlekettik aiyptaýshy Jaidarbek Quttybaevty 6 jylǵa, al Erken Abaevty 5 jylǵa bas bostandyǵynan aiyrýdy suraǵan. Sot bul talaptardy qanaǵattandyryp, ekeýine de memlekettik qyzmette jumys isteýge ómir boiyna tyiym saldy.
Qandai baptar boiynsha kináli dep tanyldy
Sot Jaidarbek Quttybaevty Qylmystyq kodekstiń 190-baby 3-bóligi 1 jáne 2-tarmaqtary boiynsha («Laýazymdyq jaǵdaiyn paidalana otyryp, iri kólemde jasalǵan alaiaqtyq») kináli dep tanydy.
Al Erken Abaev Qylmystyq kodekstiń 28-babynyń 5-bóligi («Qylmystyq quqyqbuzýshylyqqa qatysýshylardyń túrleri») jáne 367-babynyń 2-bóligi («Eleýli mólsherde para berý») boiynsha sottaldy.
Sot úkimimen sottalǵandarǵa memlekettik qyzmette, quqyq qorǵaý organdarynda, jergilikti ózin-ózi basqarý organdarynda, qarjy uiymdarynda, baqylaý jáne qadaǵalaý qurylymdarynda, sondai-aq memlekettik jáne kvazimemlekettik sektorda qyzmet atqarýǵa ómir boiyna tyiym salyndy.
Is qalai bastaldy?
2025 jyldyń qyrkúieginde Jaidarbek Quttybaevqa qatysty tekserý júrgizilip jatqany belgili bolǵan edi. Redaktsiia derekkózderiniń málimetinshe, tekserý politsiia qyzmetkeri Darhan Ýálievke qatysty kadrlyq sheshimdermen bailanysty bolǵan.
Tergeý nusqasyna sáikes, Darhan Ýáliev Erken Abaev pen onyń jetekshisi Jaidarbek Quttybaevtyń ústinen aryz jazǵan. Abaevtyń oblystyq politsiia basshylyǵynyń orynbasaryna belgili bir máseleni sheshý úshin júgingeni aitylǵan.
Sondai-aq hat almasý Abaev pen Ýáliev arasynda júrgeni, al Quttybaevtyń bul dialogqa tikelei qatyspaǵany habarlanǵan. Tekserý qorytyndysynan keiin Jaidarbek Quttybaev qyzmetinen shettetilip, keiin ustaldy. Al sol kezde Erken Abaevqa izdeý jariialanǵan bolatyn.
