QR Bala quqyqtary jónindegi ýákili Dinara Zákieva 12 jasqa deiingi balalardy qaraýsyz qaldyrýǵa zańnamalyq deńgeide tyiym salýdy usyndy, dep habarlaidy Dalanews.kz.
Bul týraly ol óziniń áleýmettik jelidegi paraqshasynda málimdedi.
Aitýynsha, jyl basynan beri el aýmaǵynda balalardyń ómirin qiǵan 15 órt oqiǵasy tirkelgen.
"Aqmola oblysynda jeke úide bolǵan órt eki balanyń ómirin qidy. Qaiǵyly jaǵdaiǵa elektr symdarynyń qysqa tuiyqtalýy jáne tútin sebep bolǵany anyqtaldy. Jaqyndaryna kóńil aitamyn. Qazirgi ýaqytta oqiǵanyń sebepteri tekserilip, tergeý amaldary júrgizilýde.
2024 jyly oryn alǵan 15 qaiǵyly oqiǵanyń basym bóligi balalardyń úide jalǵyz qalýymen bailanysty ekenin eskerip, 12 jasqa deiingi balalardy úlkenderdiń baqylaýynsyz qaldyrýǵa tyiym salýdy qarastyrý qajet dep sanaimyn. Sonymen qatar, mundai zańnamalyq ózgerister aiasynda kómekke muqtaj otbasylarǵa qoldaý kórsetý sharalaryn da júzege asyrý mańyzdy", – dedi ýákil.
Eske salaiyq, buǵan deiin Zákieva jalǵyzbasty úilenbegen er adamdarǵa bala asyrap alýǵa ótinish berýge múmkindik beretin Qazaqstan Konstitýtsiialyq sotynyń sheshimine qatysty pikir bildirgen edi.
Zakieva jańa normamen kelispeitinin bildirip, tirkelgen nekede turmaǵan er adamdarǵa balalardy berýge tyiym salýdy saqtaýdy talap etken bolatyn.
"Bul máseleni talqylaý kezinde men jáne balalardyń quqyqtaryn qorǵaý komiteti qoldanystaǵy zańnamada balalardyń qaýipsizdigin qamtamasyz etý turǵysynan balalardy tirkelgen nekede turmaǵan er adamdarǵa berý múmkindigine tyiym salýdy saqtaý qajet degen ustanymdy joldadym jáne aittym", - dedi Bala quqyqtary jónindegi ýákil.
Zákievanyń pikirinshe, balalardyń qaýipsizdigin qamtamasyz etýdiń barlyq tetigin qarastyrý qajet.
"Bala asyrap alýǵa úmitkerlerge qoiylatyn talaptardy arttyrý, sondai-aq, asyrap alýshy ata-analar mektebinde oqytý protsesin qarastyrý qajet bolýy múmkin. Sonymen qatar, bala asyrap alýshy ata - analardy balalardy qoldaý ortalyqtarymen odan ári súiemeldeýdi kózdeý qajet", - dedi balalar ombýdsmeni.
