Ult aspaptar orkestrinde kózi nashar kóretin jáne zaǵip 30 bala bar. Olardyń barlyǵy da Almatyda ornalasqan №4 N.Ostrovskii atyndaǵy internettyń tárbielenýshileri. Balalar óleń aitady, aspaptarda oinaidy, kontsertter ótkizedi. Olar úshin mýzyka jai ǵana ýaqyt ótkizýge arnalǵan qyzyǵýshylyq emes, bul – bolashaqta ainalysatyn kásibi. Mýzykamen ainalysqysy keletinderdiń qatar kún sanap artyp otyr, biraq aspap bárine birdei jete bermeidi. Osyndai máseleni kórgen mýzykant Dana Meiirbekova oqýshylarǵa kómektesýdiń jolyn qarastyrdy.
«Inkliýzivti bilim alatyn balalarǵa arnalǵan baiqaýda qazylar aqasynyń múshesi boldym, sol kezde osy orkestr týraly bildim. Balalar taǵdyryna shaǵym aitpai, óz betterimen ómir súrýdi úirenýge talpynǵandary shabyttandyrdy. Búgin orkestr úzdik shyǵarmalaryn oryndaidy. Kórermen jas mýzykanttardyń talpynysyn baǵalap, qajetti aspapty satyp alýǵa qol ushyn sozady dep oilaimyn. Balalardy qoldai otyryp, kontsertke ózim, ulym jáne mýzykant dostarym da qatysady. Bul is-sharany «Atamekenim» aktsiiasynyń aiasynda ótkizip otyrmyz. Byltyr Almaty qalasy kásipkerler palatasynda kýrstan óttim. Bizge qoldaý kórsetti, «Art Mobile» mobildi óner mektebiniń ashylýyna arnaiy grant utyp aldyq. Biz endi biznestiń ókilimiz, osylaisha ózimizdiń áleýmettik jaýapkershiligimizdi kórsetemiz», - dep baiandady Dana Meiirbekova.
N.Ostrovskii atyndaǵy zaǵip jáne kózderi nashar kóretin balalarǵa arnalǵan mektep-internattyń tárbielenýshisi Ermek Baisalbekovtiń aitýynsha, ekinshi synypta oqyp júrgende qandai aspapta oinaǵysy keletinin suraǵan eken. Ol baiandy tańdaǵan. Ermek týǵannan zaǵip. Notany Barail júiesi arqyly tanyǵan. Arnaiy ádebiet jetispegende erekshe estý qabiletiniń arqasynda aspapta oinaýdy meńgergen.
«Mýzykamen ainalysqanyma 6 jyl boldy. Bolashaqta mýzykant bolǵym keledi. Túrli kontsertterge qatysqym keledi. Bizdiń muǵalimimiz osy internata oqyǵan, mýzykalyq kolledji aiaqtaǵan, qazir bizge úiretip keledi», - deidi Ermek Baisalbekov.
Qaiyrymdylyq keshte orkestrge kontrabas dombyra men eki bas dombyra syiǵa berildi. Al jinalǵan qarajatqa baian men urmaly aspaptar satyp alý josparlanǵan.
